1992 онд нээгдэж, монголын нүүрсний экспортын 70 гаруй хувийг гүйцэтгэж буй Гашуунсухайт боомт, Цагаан хад орчимд 20 гаруй мянган хүн ам ажиллаж амьдарч байгаа мөртлөө 27 жилийн турш тог цахилгаангүй, цэвэр усны хомсдолтой төдийгүй дорвитой бүтээн байгуулалт хийгдээгүй өнөөдрийг хүрчээ. Боомт орчмын бүс нутгийн эрх зүйн орчин дутмаг, тус бүс нутагтай холбоотой Засгийн газрын шийдвэр тогтворгүй, тухайн бүс нутгийн харьяалал, статус тодорхой бус, хариуцах төрийн байгууллага байхгүй зэргээс шалтгаалан Цагаан хад төрийн бодлогоос орхигдсон газар болсон юм.
Сүүлийн жилүүдэд Өмнөговь аймгийн удирдлагуудын зүгээс Цагаан хадны хөгжилд онцгой анхаарч, өнгөрсөн жил Хайрхан багийн төв 3 байшинг бүрэн засварлаж, цэвэр усны байгууламжийг барьсан бол, энэ жил аймгийн төсвөөр цахилгаан татах, бохирын системийн ажлыг шинээр хийлгэж байна. Цахилгаан дамжуулах станцын ажил 80 хувьтай явагдаж байгаа бөгөөд энэ ондоо багтаан Цагаан хадны аж ахуй нэгж, айл өрхийг цахилгаанаар хангахаар төлөвлөж байна. Мөн энэ жил Өмнөговь аймаг болон ӨМӨЗО-ны Баяннуур аймаг хооронд хамтын ажиллагаа тогтоосны 30 жилийн ой болж байгаа бөгөөд ойг угтаж хоёр аймгийн Засаг дарга нарын байгуулсан санамж бичгийн хүрээнд Баяннуур аймгийн буцалтгүй тусламжаар Хайрхан багт хилийн боомтын албан хаагчдын 24 айлын орон сууцыг барих ажил эхлээд байна.
