Монгол Улсын Засгийн газрын 2018 оны 06 дугаар сарын 20-ны өдрийн 183 дугаар тогтоолоор Монгол орон даяар Монголын Хүүхдийн спортын ҮI их наадмыг 3 үе шаттайгаар зохион байгууллаа. Тус их наадмын 3 дугаар үе буюу улсын шигшээ тэмцээн 2019 оны 09 дүгээр сарын 07-оос 2019 оны 09 дүгээр сарын 15-нд Улаанбаатар хотноо амжилттай болсон бөгөөд энэ шигшээ тэмцээнд Өмнөговь аймгаас 150 гаруй тамирчид, 19 багш дасгалжуулагчтайгаар оролцсон юм.
Өмнөговь аймгийн өсвөрийн тамирчид 17 төрөлд өрсөлдөж 10 спортын төрөлд медальт байранд, 4 спортын төрлөөр шагналт байранд шалгарч, алт 8, мөнгө 14, хүрэл 33, нийт 55 медальт хүртсэн амжилтыг үзүүлжээ.
Мөн энэ үеэр улсын хэмжээнд спортын төрөлжсөн сургалттай 10 сургуулиудыг их наадамд оролцсон оролцоо, амжилтаар нь байр эзлүүлэхэд Өмнөговь аймгийн Даланзадгад сумын спортын төрөлжсөн сургалттай 7-р сургууль Улаанбаатар хо дэд байр эзэлж зохион байгуулах хорооны шагналаар шагнагдлаа. Тус сургуулиас Хүүхдийн спортын ҮI их наадамд Өмнөговь аймгаас төлөөлөн 54 хүүхэд шигшээ тэмцээнд оролцсон байна.
Энэ удаагийн хүүхдийн спортын их наадамд Өмнөговь аймгийн тамирчид шинээр бадминтон, бокс, буудлага, пара хөнгөн атлетикийн төрлөөр оролцсноороо онцлог байлаа. Хүүхдийн спортын их наадамд Өмнөговь аймгаас төлөөлөн оролцсон өсвөрийн тамирчид, багш, дасгалжуулагч, ивээн тэтгэгч нартаа баяр хүргэж амжилтын дээд хүсье.
