Өчигдөр буюу 4 сарын 10 ны өдөр Сөүл хотын COEX төвд Солонгосын Боксыг Дэмжих Сан, Монголын Боксын холбоотой Хамтын ажиллагааны санамж бичигт гарын үсэг зурах ёслол боллоо. Энэхүү арга хэмжээнд СБДС-ийн Ерөнхийлөгч Ким Жү Ёнг, МБХ-ны Ерөнхийлөгч Д. Бат-Эрдэнэ, дэд Ерөнхийлөгч Энхбатын Бадар-Ууган, Солонгосын Биеийн Тамирын Удирдлагын Холбооны дэд Ерөнхийлөгч Канг Ху Соек нар оролцов.
Солонгосын боксыг дэмжих сангаас "Манай 2 байгууллага цаашид байнгын холбоотой хамтын ажиллагааг өрнүүлж, боксын спортыг хөгжүүлэх олон талт хамтын ажиллагааг өргөжүүлэх ажилд хамтран ажиллахаар боллоо" гэдгээ албан ёсоор танилцуулсан бөгөөд тус сангийн Ерөнхийлөгч Ким Жү Ёнг нь "Ковид19-тэй холбоотойгоор төлөвлөгдсөн байсан ёслолын арга хэмжээг хийж чадаагүй ч дотно яриа, хэлэлцээрийн үр дүнд боксын спортын хөгжил, дэвшилд хамтдаа зүтгэх чин сэтгэлтэй байгаагаа харилцан ойлголцсон" гээд "Бид энэхүү хамтын ажиллагаагаараа боксын мөрөөдлийн модыг тарихад бүхий л хүчээ дайчилж ажиллацгаах болно. Энэхүү хамтын ажиллагаагаар боксын спортыг БНСУ-ын ард түмний хайртай спорт болохын төлөө хичээх болно" хэмээн ярилцлага өгчээ.
Тэрээр тус сангийн удирдлагаас Монголын боксын холбооны Ерөнхийлөгч Д. Бат-Эрдэнийн тухай "2012-2014 он хүртэл Монгол Улсын Батлах хамгаалахын сайдын албыг гүйцэтгэж байсан ба боксын спортыг хөгжүүлж Монгол улсын бүх нийтийн биеийн тамир болгон хөгжүүлэх үйлсэд сэтгэл зүрхээ зориулан ажиллаж буй хүн" гэж танилцуулсан бол дэд Ерөнхийлөгч Э. Бадар-Ууганы тухай "2008 оны Бээжингийн олимпийн Боксын төрөлд Алтан медаль хүртэж, Монгол Улсын анхны Олимпийн алтан медалийг авчирсан хүн" хэмээн танилцуулсан юм.
Гарын үсэг зурах ёслолын үеэр хоёр байгууллага нь ковид19 цар тахал намжсаны дараа буюу энэ оны хоёрдугаар хагаст Солонгос-Монголын боксын хамтарсан арга хэмжээг хамтын ажиллагааны анхны ажил болгон зохион байгуулахаар төлөвлөж байгаа гэдгээ дуулгалаа.
Эх сурвалж: БНСУ-ын Mydaily news мэдээг Күүкмин Их Сургуулийн багш Ц.Өнөрзаяа орчуулав.