Өмнөговь аймгийн хэмжээнд намаржилт тааруу улмаас тус аймгийн 414 өрхийн 163,8 мян толгой 7 аймгийн 12 сумын нутагт оторлож байна. Өвөлжилтийн бэлтгэл ажлын хүрээнд Өмнөговь аймгийн удирдлагууд Баянхонгор, Дундговь, Дорноговь, Өвөрхангай аймгуудын удирдлагуудтай мал, малчдыг өвөлжүүлж, хаваржуулах талаар хамтран ажиллах санамж бичгийг байгуулах, 2023-2024 оны өвөл хавар хамтран даван туулах зорилгоор уулзалт хийхээр төлөвлөн ажиллаж байгаа билээ. Энэхүү төлөвлөлтийн хүрээнд Өмнөговь аймгийн Засаг даргын орлогч Ц.Дэнээдоржоор ахлуулсан ажлын хэсэг өнгөрсөн 7 хоногт Өвөрхангай аймагт ажиллаж хамтран ажиллах санамж бичгийг байгууллаа.
Уг санамж бичигт Өмнөговь аймгаас тус аймгийн нутагт отроор яваа өрх, малын тооны мэдээллийг тухай бүр харилцан солилцож, бэлчээр нутгийг зааж өвөлжүүлж, хаваржуулах, малыг мал эмнэлгийн үйлчилгээнд цаг алдалгүй хамруулах, цаг агаар хүндэрсэн нөхцөлд гэрээг сунгах, өөр нутаг бэлчээрийг ашиглах гэрээ хэлцэл хийх зэрэг асуудлыг тусгажээ.
