Орон нутагт үйлдвэрлэлийг хөгжүүлэх зорилгоор 2022 онд Өмнөговь аймгийн ИТХ-ын тогтоол гарч Даланзадгад суманд үйлдвэр, технологийн цогцолбор парк" байгуулахаар шийдвэрлэсэн юм.
Энэхүү тогтоолын хэрэгжилтийн хүрээнд Даланзадгад сумын урд хэсгийн 100 га газарт үйлдвэр технологийн цогцолбор парк байгуулах ажлыг эхлүүлж, орон нутгийн төсвийн 8.2 тэрбум төгрөгийн хөрөнгө оруулалтаар хатуу хучилттай авто, цахилгааны шугам, холбоо, интернетийн сүлжээ болон цэвэр усны шугамын бүтээн байгуулалтыг хийгээд байна.
Орон нутгийн зүгээс үндсэн дэд бүтцийн бүтээн байгуулалтыг хийж, иргэн, аж ахуйн нэгжид үйлдвэрлэлийн зориулалтаар газар олгосноор аж ахуйн нэгжүүд үйлдвэрийн барилга барих ажлаа эхлүүлж байна. Энэ бүсэд ноос боловсруулах үйлдвэр, оёдол, нэхмэлийн үйлдвэр, барилгын материалын үйлдвэрүүд, мод, модон эдлэлийн үйлдвэр зэрэг гадаад, дотоодын хөрөнгө оруулалттай үйлдвэрүүд баригдаж, үйлдвэр, тээвэр ложистикийн цогцолбор болох юм.
Үйлдвэрлэлийн бүсэд төр хувийн хэвшлийн түншлэлийн хүрээнд баригдаж буй ноос угаах үйлдвэр, хувийн хөрөнгө оруулалтаар баригдаж буй ингэний сүүний үйлдвэр, орон нутгийн хөрөнгө оруулалтаар баригдаж буй хог хаягдал дахин боловсруулах үйлдвэрүүд удахгүй ашиглалтад орно.
НООС УГААХ ҮЙЛДВЭР:
Төр, хувийн хэвшлийн түншлэлийн хүрээнд жилдээ 4 мянган тонн ноос угааж, боловсруулах хүчин чадал бүхий ноос угаах үйлдвэр баригдаж байна. Энэхүү үйлдвэр ашиглалтад орсноор Өмнөговь, Дундговь, Өвөрхангай, Баянхонгор зэрэг хөрш зэргэлдээ аймгийн малчдаас хонь, тэмээний ноос хүлээн авч, боловсруулж экспортод гаргах, хөнгөн үйлдвэрийг түүхий эдээр хангах боломж бүрдэх юм.
ИНГЭНИЙ СҮҮНИЙ ҮЙЛДВЭР-ИНГЭНИЙ ФЕРМ:
НҮБ-ын Хүнс, хөдөө аж ахуйн газраас хэрэгжүүлж буй төслийн хүрээнд Даланзадгад суманд ингэний фермийн үйл ажиллагаа эхлүүлж, ингэний сүү боловсруулах үйлдвэр баригдаж байна. Үйлдвэрийн үйл ажиллагааг тасралтгүй явуулахын тулд нийт 2500 тэмээг эрчимжүүлсэн болон уламжлалт аж ахуйн аргаар маллаж өсгөхөөр төлөвлөсөн бөгөөд уг фермд одоогоор 200 гаруй ингэтэй, 10 гаруй саальчин, тогооч, малын эмч, технологич ажиллаж, эмнэг ингэнүүдийг автомат саалтуураар сааж сургаж байна. Тус үйлдвэр ингэний сүүг шүүж, нэмэлт хольцгүйгээр хуурай сүү үйлдвэрлэх, ингэний хоормогийг савлан худалдаанд гаргах бөгөөд цаашдаа ингэний сүүний хуурай сүүг олон улсын зах зээлд гаргахаар төлөвлөж байгаа ажээ.
ХОГ ХАЯГДАЛ ДАХИН БОЛОВСРУУЛАХ ҮЙЛДВЭР:
Үйлдвэр технологийн цогцолбор паркийн бүсэд Өмнөговь аймгийн ЗДТГ, Байгаль орчин, аялал жуулчлалын газрын санаачилгаар “Говийн оюу” хөгжлийг дэмжих сангийн 1.3 тэрбум төгрөгийн санхүүжилтээр “Хог хаягдал дахин боловсруулах үйлдвэр” баригдаж байна. Энэхүү үйлдвэр нь “Хог хаягдал дахин боловсруулах үйлдвэрийн барилга, авто зам, явган хүний зам, зогсоол, ногоон байгууламж бүхий цогцолбор хэлбэрээр баригдаж байгаа юм. Уг үйлдвэр ашиглалтад орсноор уул уурхай болон ахуйн хэрэглээнээс гарсан хаягдал хуванцарыг дахин боловсруулж бүтээгдэхүүн үйлдвэрлэх юм.
