Өмнөговь аймгийн хэмжээ "Тэрбум мод" үндэсний хөдөлгөөн, "Ойн менежментийн мастер төлөвлөгөө-2030"-ыг хэрэгжүүлэх, аймгийн Засаг даргын "Нутгийн хишиг " үйл ажиллагааны хөтөлбөрийн хүрээнд ойжуулалтыг нэмэгдүүлэх, тарьц суулгацыг бэлтгэн ажлыг өргөжүүлэх чиглэлээр олон ажлуудын хийгдэж байна. Энэ хүрээнд аймгийн заг тариалалтыг нэмэгдүүлэх, тарьц суулгац бэлтгэх зорилгоор Засаг даргын захирамжаар Даланзадгад сумын 15 иргэнтэй гэрээ байгуулан, ирэх жил 20,000 ширхэг тарьц нийлүүлэх гэрээ байгуулан, заг тариалалтын чиглэлээр онол, практик хосолсон сургалтыг явууллаа.
Заг тариалалтын талаар сонирхуулахад 10 дугаар сарын дунд үеэс эхлэн 20 хоногийн хугацаанд нэг га талбайгаас 100-150 килограмм загийн үр түүх боломжтой бөгөөд түүсэн үрээ цэвэрлэж, чийгтэй, агаар сайтай байранд хадгалаад, тариалах үедээ 10 сантиметр өргөнтэй хоёр мөр гарган туузалж, нэг метр тутамд гурван грамм үрийг элсэрхэг хөрсөнд 0.5-1 сантиметр гүнд суулгана. 1 га талбайд 700-750 шоо метр усаар анхны усалгааг хийх бөргөөд дараа нь соёололт жигдрэх хүртэл 14 хоногийн хугацаанд өдөр бүр 150-200 шоо метр усаар 2 удаа усалж өгвөл ургалт түргэсдэг байна. Ийм аргаар говийн элсний нүүдлийг зогсоож цөлжилттэй тэмцэх боломжтой ажээ.Заг бол зөвхөн Төв Азийн говьд ургадаг илчлэг сайтай, эрчилсэн урт үндэстэй, олон зуун жилээр насалдаг мод. Монгол орны ойн нөөцийн багагүй хувийг эзлэх бөгөөд говь цөлийн бүсийн үндсэн мод юм. Заг ихтэй газар цагаан гоёо их ургадаг. 100 килограмм заг 80 килограмм чулуун нүүрстэй тэнцүү хэмжээний илчлэг ялгаруулдаг. 4500 килокалори дулаан ялгаруулдаг учраас говийнхон “ургаа нүүрс” гэж нэрлэдэг. Гэвч сүүлийн жилүүдэд заг модыг түлшинд их хэмжээгээр ашигласнаас үүдэлтэйгээр бараг устаж үгүй болж байна. Заг мод нь элсний нүүдлийг барьж тогтоох ач холбогдолтой. Хэзээ орох нь мэдэгдэхгүй бороонд найдалгүйгээр хөрсөн доор хэдэн метрээр ч хамаагүй үндсээ сунгаж ус чийг хайн ургадаг мод юм. Үндэс нь доошоо 5 метр хүртэл гүнд, тал тал тийшээ 5-10 метр хүртэл салаалан тархан ургадаг учраас заг мод нь газар дээр маш бат бөх зогсож ямар ч хүчтэй салхийг сөрж, эрч хүчийг нь бууруулан элсний нүүлтийг тогтворжуулан барьдаг ач холбогдолтой ургамал юм.
