Монгол улсын Засгийн газрын гишүүн, Эрүүл мэндийн сайд Ж.Чинбүрэнг Өмнөговь аймагт ажиллах үеэр УИХ-ын гишүүн, ЭЗБХ-ны дарга Р.Сэддорж, аймгийн Засаг дарга Н.Энхбат хүлээн авч уулзлаа.
Өмнөговь аймгийн Гашуун сухайт боомтын нүүрс тээвэр, уул уурхайг дагасан 22000 гаруй иргэд Цагаан хад суурьшлын бүсэд ажиллаж амьдарч байна. Эдгээр иргэдэд эрүүл мэндийн тусламж үйлчилгээг хүргэх шаардлага нэн тэргүүнд тавигддаг. Энэ хүрээнд аймгийн удирдлагууд суурьшлын бүсийг тосгоны статустай болгож эмнэлэг, сургууль, цэцэрлэг, цагдаа, онцгой байдал зэрэг төрийн байгууллагын үйлчилгээг иргэдэд хүргэх хүсэлтийг Засгийн газарт уламжилж ирсэн. Хот тосгоны эрх зүйн байдлын тухай хуулийн дагуу Цагаан хад суурьшлын бүсийг тосгон болгон эдгээр байгууллагыг байгуулахад цаг хугацаа шаардлагатай тул яаралтай Засгийн газрын тэргүүний үүрэг даалгаврын дагуу эмнэлэг байгуулах ажлыг нэн тэргүүнд эхлүүлэхээр Эрүүл мэндийн сайд Ж.Чинбүрэн манай аймагт ажиллаж эмнэлэг байгуулах газрыг тогтоох, нөхцөл байдалтай газар дээр нь ирж танилцаж байна.
Эрүүл мэндийн үндэсний зөвлөлийн тогтоолоор 30-60 насны эрэгтэйчүүдийн эрүүл мэндийн даатгалын сангийн санхүүжилтийг нэмэгдүүлсэн. Иймд тээврийн компани, аж ахуй нэгжүүд жолооч, ажилчдыг эрүүл мэндийн даатгалд хамруулах, эрүүл мэндийн төвүүд түр оршин суугчдыг бүртгэх ажлыг хэрэгжүүлснээр орон нутгийн эмнэлгийн байгууллагын ЭМД-ын сангийн санхүүжилт нэмэгдэн анхан шатны эрүүл мэндийн төв тогтвортой үйл ажиллагаа явуулах, тусламж үйлчилгээний чанар хүртээмж сайжрах давуу талтайг Эрүүл мэндийн сайд Ж.Чинбүрэн онцгойлон ажил хэрэг болгох чиглэл өглөө.
Цаашлаад холын тээвэрт явж буй жолооч нарын хүнсний аюулгүй байдал, ариун цэврийн үйлчилгээ авах нөхцөлийг сайжруулах нэн шаардлагатай байгааг онцоллоо.
Аймгийн Засаг даргаас Цагаан хад суурьшлын бүсээс гадна Шивээ хүрэн боомтын Морин заг суурьшлын бүсэд ажиллаж амьдарч буй 12000 иргэнд төрийн үйлчилгээг хүргэхэд Засгийн газраас анхаарч ажиллах хүсэлтийг илэрхийллээ.
