МУ-ын Засгийн газрын гишүүн, Зам тээврийн сайд Б.Дэлгэрсайхан болон холбогдох албаныхан Өмнөговь аймагт ажиллаж байна. Энэ хүрээнд өнөөдөр Гашуун сухайт боомт, Цагаан хад суурьшлын бүсийн тээврийн компанийн төлөөллүүд, жолооч нартай уулзалт зохион байгууллаа. Уулзалтаар тээвэрчдэд тулгамдаж буй асуудлууд, авто замын нөхцөл байдлыг сонсож хариулт өглөө. МУ-ын Засгийн газраас нүүрс тээврийг нэмэгдүүлэх чиглэлээр барьж буй бодлого чиглэл, Цагаан хад суурьшлын бүсийг тосгоны статустай болгож иргэдэд эмнэлэг, цагдаа, онцгой байдал, сургууль, цэцэрлэг байгуулж төрийн үйлчилгээг хүргэх ажлын явцын талаар танилцуулсан байна.
Мөн Гашуунсухайт-Ганцмод боомтод “Хятадын төмөр замын барилгын гүүрийн инженерингийн товчоо групп” ХХК-ийн Намын хорооны дарга, ТУЗ-ийн дарга Жоу Гауньнань тэргүүтэй төлөөлөгчидтэй уулзлаа.
Уулзалтын үеэр хил дамнасан төмөр замын бүтээн байгуулалтын ажлын явц, тулгамдаж буй асуудлууд болон цаашид авах арга хэмжээний талаар санал солилцож, төслийн санхүүжилтийн хүрээнд “Эрдэнэс Тавантолгой” ХК нийт санхүүжилтийн 30 хувийг 2025 оны есдүгээр сарын 1-ний өдөр гүйцэтгэгч талд шилжүүлсэн хэдий ч өнөөдрийн байдлаар барилга угсралтын ажлын гүйцэтгэл 10 орчим хувьтай үргэлжилж байгааг онцлоод, ажлаа эрчимжүүлэх шаардлагатайг хэлж, төслийн барилга угсралтын ажлыг эрчимжүүлэх, нарийвчилсан төлөвлөгөөг яаралтай боловсруулан батлуулж мөрдөхийг үүрэг болголоо.
