Даланзадгад сумын Засаг даргын Тамгын газраас “Эрүүл иргэн-Хөгжлийн тулгуур” дэд хөтөлбөрийн хүрээнд "Бумбардай" хүүхдийн зуны элсний сувиллыг эхлүүлээд байна. Шим билэг, Өнө-Орших, Энхийн хүслэн өрхийн эрүүл мэндийн төвүүдтэй хамтран "Бумбардай” хүүхдийн зуны сувилалыг 7 сарын 24-өөс эхлэн 8 сарын 6-ны өдрүүдэд 2 ээлжээр зохион байгуулж 120 хүүхдийг хамруулах ажээ. Тус сувилалд 06 сартайгаас 2 хүртэлх насны ихэр болон өсөлт, хоол тэжээлийн дутагдалтай, хөгжлийн бэрхшээлтэй 3 хүртэлх насны хүүхэд гээд хамрагдах хүүхдийг нэрсийг өрхийн эрүүл мэндийн төвийн хүүхдийн эмч нар гарган урьдчилан сэргийлэх үзлэгт хамруулан, өсөлт хөгжилтийг хэмжиж, эцэг эхчүүдэд зөвлөгөө зөвлөмж өгч ажиллаж байна. Сувилалд хүүхдүүдэд тосон бариа хийх, жингийн алдагдалтай хүүхдүүдийн эцэг эхэд хоол тэжээлийн зөвлөгөө өгч, хүүхдүүдэд амин дэмтэй хоол цай өгөхийн зэрэгцээ олон төрлийн амин дэмээр витаминжуулж давсан дээр гишгүүлж элсэн дээр тоглуулан иллэг массаж, бариа хийж айраг, шархайгаар биеийг шавшиж, чийрэгжүүлэх эмчилгээ үйлчилгээ хийхээр төлөвлөжээ.
