Өмнөговь аймгийн ИТХ-ын Тэргүүлэгчдийн 2021 оны 33 дугаар тогтоолоор усны нөөцийн хомстлоос сэргийлж, боломжит нөөцийг зүй зохистой ашиглах, гадаргын усыг хуримтлуулан, эрэлт хэрэгцээг хүртээмжтэй хангах нөхцөлийг бүрдүүлэх, говийн бүсрүү ус дамжуулах хоолой барьж байгуулан улмаар говийн бүсийн хүн ам, уул уурхай, хөдөө аж ахуйн үйлдвэрлэлийг усаар хангах зорилгоор ГОВЬ+УС хөтөлбөрийг батлан хэрэгжүүлж байна.
Хөтөлбөрийн хүрээнд:
1.2020 онд Өмнөговь аймгийн ИТХ дахь АН-ын бүлгийн санаачлагаар “Говийн ус-Ногоон хөгжил” эрдэм шинжилгээ, инновацийн анхдугаар чуулганыг зохион байгуулж, усны салбарын мэргэшсэн эрдэмтэн судлаачид оролцож Өмнөговь аймгийн усан хангамж, тулгамдсан асуудал, шийдэл гарцын талаар санал солилцсон билээ.
2.ГОВЬ+УС хөтөлбөрийн хүрээнд аймгийн ИТХ, ЗДТГ-аас санаачлан 2023 оны 11 дүгээр сард говийн ус, усан хангамжийн эх үүсвэрийн асуудлыг Засгийн газрын бодлогын хэмжээнд хүргэх, томоохон төсөл хөтөлбөрийг хэрэгжүүлж усны эх үүсвэрийг нэмэгдүүлэх зорилготойгоор ГОВЬ+УС чуулганыг амжилттай зохион байгуулж, эрдэмтэн орон нутгийн удирдлага, мэргэжлийн байгууллага, эрдэмтэн судлаачдын саналыг нэгтгэж УИХ, Засгийн газарт хүргүүллээ.
3.Хэрлэн гол дээр ус хуримтлуулах сан байгуулж, урсацын тохируулга хийн, ус дамжуулах хоолойгоор дамжуулалт хийх “Хэрлэн тооно” төслийг Эрдэнэс Оюу Толгой ХХК-иас санаачлан хэрэгжүүлэхээр төлөвлөн ажиллаж буй билээ. Төслийн ТЭЗҮ-ийг шинэчлэн боловсруулахад Оюутолгой ХК дэмжлэг үзүүлж ажиллах юм. Энэхүү төсөл амжилттай хэрэгжснээр говийн бүс нутгийн өсөн нэмэгдэж буй хот суурин, хүн ам, хөдөө аж ахуй, байгаль хамгаалах зориулалтаар ашиглах, томоохон уул уурхайн үйлдвэрийн ус хангамжтай хамтад нь шийдвэрлээд зогсохгүй ногоон байгууламжуудыг дахин сэргээх боломж бүрдэх юм.
4.Орон нутгийн төсвийн хөрөнгө оруулалтаар Улааннуур-Даланзадгад- Тавантолгой ус дамжуулах байгууламжийн ТЭЗҮ-ийг батлууллаа. Энэхүү төслөөр 12сая/м3 эзэлхүүн бүхий усан сантай, 4 ширхэг өргөлтийн насостой станц, 355 км ус дамжуулах хоолой барьж байгуулахаар төлөвлөгдсөн.
5.Даланзадгад сумын төвийн ус хангамжийн 2-р эх үүсвэрийн талбайд явуулах газрын доорх усны эрэл, хайгуул судалгааны ажил хийгдэж, Манлай сумын төвийн хүн амын усан хангамжийн эх үүсвэрийн зориулалттай Үйзэнгийн хэсгийн газрын доорх усны нөөцийг 25 жилийн хугацаатай С зэргээр 2.5 л/сек үнэлж БОАЖЯ-ны Усны нөөцийн зөвлөлөөр батлуулаад байна.
6.Гадаргын усыг хуримтлуулж зэрлэг амьтадыг услах, газар тариаланд ашиглах зорилгоор Ханбогд, Баяндалай, Баян-овоо, Ханхонгор, Даланзадгад, Гурвантэс, Сэврэй суманд хөв цөөрөм байгуулах зураг төсвийг гарган, 2022-2023 онд орон нутгийн төсвийн 1.9 тэрбум төгрөгийн хөрөнгө оруулалтаар Даланзадгад суманд 18 мянга м куб, Баяндалай суманд 46,8 м куб, Сэврэй суманд 7,5 м куб, Гурвантэс суманд 3.3 м куб, Номгон суманд 1,8 м куб, Ханхонгор суманд багтаамжтай хөв цөөрөм байгууллаа.
7.Байгалийн даралтат усыг ашиглан тэжээлийн ургамал тариалах төсөл хэрэгжүүлж зорилгоор Ханхонгор сумын нутаг дэвсгэр дэх Гоожуурын булгийн хуучин цооногийг засварлан 300 метр кубийн багтаамжтай усан сан, хашаа бүхий тариалангийн хоёр га талбай барьж, усалгааны систем бий болголоо.
8.Ханхонгор сумын Жаргалант багийн нутаг дахь Шавартайн услалтын системийн цөөрмийг шинээр барьж байгууллаа. Шинэ цөөрмийг технологийн орчин үеийн шийдлийг ашиглан, үерийн усыг цөөрөм рүү оруулахгүй байх байдлаар хашиж байгуулсан бөгөөд уг цөөрөм нь зөвхөн булгийн усаар тэжээгдэж, Жаргалант багийн тариалангийн талбай усаар хангаж байна.
