Өмнөговь аймгийн хөгжлийн тэргүүлэх салбарын нэг бол аялал жуулчлал. Орон нутгийн зүгээс говийн үзэсгэлэнт байгаль, биологийн олон янз байдал, түүх соёл, үнэт олдворуудаа хамгаалж, эзэнжүүлж, нутгийн иргэддээ түшиглэсэн, шинжлэх ухаанд суурилсан, тогтвортой аялал жуулчлалыг хөгжүүлэх бодлого зорилт дэвшүүлэн ажиллаж байна. Энэ хүрээнд байгалийн үзэсгэлэнт газрууд буюу жуулчдын зорин очих газруудын менежментийн төлөвлөгөөг боловсруулан тухайн газруудыг цахилгаан эрчим хүчний системд холбох, хатуу хучилттай зам барих, мэдээллийн төв байгуулах ажлыг бий болгосон бүтээн байгуулалтаа орон нутгийн иргэдэд менежментийн гэрээгээр өгч эзэнжүүлэх ажлыг үе шаттайгаар хийж хэрэгжүүлж байна.
Энэ хүрээнд Өмнөговь аймаг өөрсдийн хөрөнгөөр Баянзаг, Дэмчогийн хийдийг цахилгаан эрчим хүчинд холбож, Даланзадгад-Гурвантэс чиглэлийн замын бүтээн байгуулалтыг эрчимжүүлж, Дэмчогийн хийдийг хатуу хучилттай авто замаар холбож, Даланзадгадын-Булган чиглэл, Даланзадгад-Номгон чиглэлийн хатуу хучилттай замын бүтээн байгуулалтыг эхлүүлээд байна.
Мөн орон нутгийн төсвийн хөрөнгөөр Олон улсын нисэх онгоцны буудлын зураг төсөв, Даланзадгад-Булган-Мандал-овоо чиглэлийн хатуу хучилттай зам, Хонгорын гол чиглэлийн хатуу хучилттай замыг зураг төсвийг хийгдэж дууслаа.
Орон нутгийн зүгээс хамгийн их хөрөнгө оруулалт шаардагдах дэд бүтцийн асуудлыг шийдвэрлэн бодлогын дэмжлэг үзүүлж бизнес эрхлэгч, аж ахуйн нэгжүүд маань аялал жуулчлалын үйлчилгээгээ үзүүлж аялал жуулчлал илүү хурдацтай хөгжинө.
