Өмнөговь аймгийн Цогт-Овоо сумын удирдлагууд зуны адаг сарын шинийн нэгний билэгт сайн өдөр сумынхаа улсын аварга малчдыг хүлээн авч хүндэтгэл үзүүлэх арга хэмжээ зохион байгууллаа. Уулзалтын үеэр орон нутгийн удирдлагын зүгээс Аймгийн Засаг дарга болон сумын Засаг даргын үйл ажиллагааны хөтөлбөрийн хэрэгжилт, уг хөтөлбөрт мал аж ахуйн чиглэлээр тусгагдсан ажлуудын талаар мэдээлэл өгч, аварга малчдын санал хүсэлтийг сонслоо.
Улсын аварга малчид мал аж ахуйн салбарын тулгамдсан асуудал, “Чинээлэг малчин” хөтөлбөрийг өргөжүүлэх чиглэлээр санал солилцож, малчдын залгамж халааг бэлтгэх, аварга малчдын туршлагыг түгээх, малчдын эрх ашгийг хамгаалах, малын гаралтай түүхий эдийг боловсруулах, мал аж ахуйн чиглэлээр орон нутгийн бодлогод санал уламжлах чиглэлээр нэгдэж ажиллахаар сумын Улсын аварга малчдын зөвлөлийг байгууллаа.
Мөн үндэсний их баяр наадмын босгон дээр Монгол Улсын Хөдөлмөрийн Баатар хэмээх эрхэм цол хүртсэн МУ-ын СГЗ, хөгжмийн зэмсэг урлаач Ц.Байгальжавын Хөдөлмөрийн баатар шагналын мялаалга наадамд 8 улсын аварга малчин өрх тус бүр 10 хундан цагаан хонь хандивлаж, сумынхаа малчдаа түүчээлж уриалга гаргалаа. Дашрамд дурдахад Цогт-Овоо сумаас Ц.Балхүү, М.Балдорж, Ц.Шар, Ч.Бямбаа, Т.Шар, Д.Банзрагч, Б.Малчинхүү, Б.Баттулга, Б.Галхүү , Б.Ганхуяг, Ө.Батпүрэв, Б.Тайван , Э Баттөр, Д.Алдарцэцэг зэрэг 14 Улсын аварга малчин, саальчин төрөн гарчээ.
