Аймгийн Засаг даргын үйл ажиллагааны “Өсөлттэй-Өмнөговь” хөтөлбөрийн хүрээнд говь нутгийн уламжлалт өв соёл, тэр дундаа тэмээн соёлыг түгээн дэлгэрүүлэх, тэмээн соёлд тулгуурласан аялал жуулчлалыг хөгжүүлэх, тэмээний гаралтай брэнд бүтээгдэхүүнийг нэмэгдүүлэх, дэлхийд зах зээлд борлуулах боломжийг бүрдүүлэх бодлогын хэрэгжүүлэн ажиллаж байна. Энэ бодлогын хүрээнд Өмнөговь аймгийн төлөөлөл Их Британи улсын нийслэл Лондон хотноо зохион байгуулагдсан "Монгол тэмээний өдөрлөг" арга хэмжээнд амжилттай оролцлоо.
“Монгол тэмээний өдөрлөг” арга хэмжээнд Өмнөговь аймгийн Соёл урлаг, аялал жуулчлал, залуучуудын газрын дарга Т. Мөнгөнтуул “Тэмээний уламжлал, ёс заншил, соёл, онцлог”-ын талаар илтгэл тавьж, Өмнөговь аймагт байгуулагдсан ингэний сүүний үйлдвэрийн “Солид партнерс” ХХК-ийн захирал Б.Цэнд-Аюуш ингэний хуурай сүү, хоормогийн үйлдвэрлэл, Ханбогд сумын Ханбаясгалант ХХК-ийн захирал М.Чүлтэмсүрэн тэмээний ноосон бүтээгдэхүүний таниулж оролцсон бол аймгийн ХЖТ-ын морин хуурч, хөөмийч, МУ-ын СТА Э.Түмэндэмбэрэл морин хуур, хөөмий, төмөр хуурын аялгууг толилуулж, үзэгч олны сонорыг мялааж оролцлоо.
Лондон хотод болсон “Монгол тэмээний өдөр” өдөрлөг нь Монгол орны хоёр бөхт тэмээний онцлог соёл, зан заншил, уламжлалыг сурталчлан таниулж, үндэсний брэнд бүтээгдэхүүн, тэмээний ноос, ямааны ноолууран эдлэл, гар урлал болон тэмээний сүү, сүүн бүтээгдэхүүнийг Европын зах зээлд таниулах, гаргах ач холбогдол бүхий арга хэмжээ болж өндөрлөлөө.
