Өмнөговь аймаг орон нутгийн бодлогын хүрээнд сүүлийн жилүүдэд орон нутгийн төсвийн хөрөнгө оруулалтаар аймгийнхаа нутаг дэвсгэрт археологийн судалгаа, малтлага хийлгэх, археологичдыг бэлтгэх ажлуудыг хийж хэрэгжүүлж байгаа билээ. Энэ хүрээнд Өмнөговь аймгийн Говийн байгаль түүхийн музей эрдэм шинжилгээний ажилтан, археологичтой болсон бөгөөд тус музейн эрдэм шинжилгээний баг, МУИС-ийн Нүүдэлчдийн археологийн хүрээлэнгийн багтай хамтран Өмнөговь аймгийн Сэврэй сумын нутаг дахь Баянбор нуруунд археологийн малтлага судалгааны ажил хийж гүйцэтгэлээ.
Энэхүү судалгааны ажлыг МУИС-ийн Нүүдэлчдийн археологийн хүрээлэнгийн эрдэмтэн нарийн бичгийн дарга, археологич, доктор, дэд профессор Т.Идэрхангай удирдаж тус хүрээлэнгийн археологичид болон Өмнөговь аймгийн Говийн байгаль түүхийн музейн эрдэм шинжилгээний ажилтан, археологич Д.Цэнд нар оролцсон хамтарсан баг Сэврэй сумын нутаг Баянбор нурууны ард байрлах Эрээн адуу, Таван овоо зэрэг газруудад Хүннү болон Монголын эзэнт гүрний үеийн булш оршуулгын дурсгалуудыг судалжээ. Дашрамд дурдахад энэхүү археологийн судалгаа нь Өмнөговь аймгийн Говийн байгаль түүхийн музейн хувьд анхны судалгааны ажил болж буйгаараа онцлог юм.
