Хүүхэд багачуудын зуны амралтыг ая тухтай өнгөрүүлэх, хүүхэд хөгжлийн бодлогын хүрээнд Буянт хотхон хүүхдийн зусланг орон нутгийн өмчит үйлдвэрийн газрын статустайгаар ажиллуулж байна. Өнгөрсөн хугацаанд тус зусланд орон нутгийн төсвийн хөрөнгөөр ихээхэн бүтээн байгуулалтыг өрнүүлж, амрагчдын байрны иж бүрэн засварыг хийж, тус зусланг байнгын цахилгаан эрчим хүчинд холбож, 250 хүүхдийн хүчин чадалтай зоогийн газар, стандартад нийцсэн задгай театр, халуун ус, нийтийн ариун цэврийн байгууламжийг барьж ашиглалтад оруулаад байна.
Буянт хотхон хүүхдийн зуслан 2025 онд 7 ээлжээр 1000 хүүхэд хүлээж авах бөгөөд ээлж тус нь өөр өөрийн онцлогтой танин мэдэх хөгжлийн тусгай хөтөлбөрөөр буюу 1 дүгээр ээлж нь “Зуслангийн найзууд”, 2 дугаар ээлж “Уламжлалт ёс заншлаа дээдэлье”, 3 дугаар ээлж нь “Бид эх орны хүүхдүүд”, 4 дүгээр ээлж нь “Бид байгальд хайртай”, 5 дугаар ээлж “Бид говийн хөгжлийн эзэд”, 6 дугаар ээлж нь /Филиппин багштай англи хэлний ээлж/ “Хамтдаа хөгжицгөөе” , 7дугаар ээлж нь “Хүүхэд гэр бүлдээ жаргалтай” тусгайлсан хөтөлбөртэй багачуудын хүсэл сонирхолд нийцсэн зуны амралтыг үр бүтээлтэй өнгөрүүлэх, суралцах боломжийг бүрдүүлснээрээ онцлог ажээ.
