Монголын урчуудын эвлэлийн Өмнөговь дахь салбар зөвлөл, "Өмнөговь аймгийн Урчуудын холбоо" ТББ хамтран Өмнөговь аймгийн урчуудын нэгдсэн “Нар үдэлсэн говь” үзэсгэлэнг нэгдүгээр сарын 16-23 ны өдрүүдэд Улаанбаатар хотноо гаргалаа. Энэхүү үзэсгэлэнд Өмнийн говиор овоглогдсон 40 гаруй уран бүтээлчдийн 150 гаруй бүтээл тавигдсан бөгөөд Өмнөговь аймгийн урчуудын олон төрөл дээрх нэгдэн гарсан анхны үзэсгэлэн ажээ.
Уран зураг, хөөрөг урлал, чулуун урлал, зээгт наамал, уран хатгамал, зоосон ширээ, эсгий урлал гээд 10 гаруй төрөл дээр гарч буй энэхүү үзэсгэлэнд Соёлын Гавьяат зүтгэлтэн, морин хуур урлаач П.Байгальжав, Ноён, Сэврэй хийцийн өв тээгч залгамжлагч, уран дархан С.Эрдэнэ, А.Цоож, уран зураач С.Борхүү, уран хатгалмалч Хандмаа, Ц.Батбуян, С.Буд, Ц.Цэцэгдэлгэр, М.Чүлтэмсүрэн, зураач Б.Чулуунбаатар, Ж.Одбаяр, Т.Золбоо, Ж.Санж, А.Сонинбаяр, чулуу урлаач Б.Галхүү, эсгийн сийлбэрч Э.Баттогтох нарын олон уран бүтээлчид бүтээлээ дэлгэжээ.
"Нар үдэлсэн говь" үзэсгэлэнг энэ сарын 26-30-ны өдрүүдэд Даланзадгад хотноо гаргаж нутгийн зон олондоо урчуудынхаа бүтээлийг танилцуулахаар төлөвлөснөө уран бүтээлчид онцолж байв. Ингээд уншигчиддаа тус үзэсгэлэнд оролцож буй уран бүтээлчдийн байр суурийг хүргэе.
Зураач Б.Чулуунбаатар:
Өмнөговь аймаг бол урчууд ихтэй нутаг. Сүүлийн жилүүдэд нутгийн маань урчууд нэгдэж Урчуудын холбоо байгуулан олон олон ажлуудыг санаачлан хийж байгаа.
Энэ удаагийн үзэсгэлэн бол Өмнөговь аймгийн Урчуудын нэгдсэн анхны үзэсгэлэн гэж хэлж болно.Нар үдэлсэн говь энэ үзэсгэлэнд Өмнөговьд байдаг уран бүтээлчид, нутгаасаа өөр газар ажиллаж амьдардаг гээд 40 гаруй уран бүтээлчид оролцож байгаа. Үзэсгэлэн 7 хоног үргэлжилж байгаа болохоор уран бүтээлчид маань хоорондоо танилцаж, туршлага хуваалцсан, нэг нэгнээсээ суралцсан мөн цаашид хамтран ажиллах талаар санал солилцсон гээд үр дүнтэй, үзэгч ихтэй сайхан үзэсгэлэн болж байна. Миний хувьд уран зургийн төрлөөр аавтайгаа хамт оролцож байна.
Ноён, Сэврэй хийцийн өв тээгч, уран дархан С.Эрдэнээ:
Шинэ оны эхэн дээр Өмнөговийн урчууд маань нэгдэн нийлж энэ сайхан үзэсгэлэнг гаргаж байгаад баяртай байна. Миний хувьд 30 гаруй жил Ноён, Сэврэй хийцийн мөнгөн эдлэл хийж байна. Би удмынхаа дөрөв дэх үеийн дархан. Миний төрсөн ах Сугар гэж төрийн дархан хүн байсан.
Ах маань Монгол төрийн тамгыг урласан төдийгүй Маршалын одон, Алдарт эхийн одонгийн эх, хурдан морины медалийн эх загварыг урласан. Одоогоор Сугир ахын маань хүү С.Оюунсүх, том ахын хүү Цоож болон бидний хүүхдүүд гээд манай удмын зургаан хүн Ноён, Сэврэй хийцийн мөнгөн эдлэлийг урлаж байгаа даа. Бид Ноён Сэврэй хийцийн мөнгөн эдлэлийн бүтээгдэхүүний загварын патент, барааны тэмдгийн гэрчилгээг албан ёсоор эзэмшиж байгаа урчууд. Бид мөнгөн аяга, хазаар, эмээлийн чимэг, ээмэг бөгж, бугуйвчийг Ноён, Сэврэй хийцээр урладаг. Сэврэй хийц 100 гаруй жилийн түүхтэй гэж үздэг, энэ хийцийн маань онцлог нь мөнгөний орц нь их, эдэлгээ нь сайтай байдаг. Гол технологи нь утас сүвьмалын аргачлалаар хийдгээр бусад хийцээс ялгаатай.
Эсгий сийлбэрч Э.Баттогтох:
Би Өмнөговь аймгийн Булган сумаас ирж энэ үзэсгэлэнд оролцож байгаа. Миний хувьд эсгий сийлбэр хийдэг уран бүтээлч. 2013 онд автомашины осолд ороод суугаа болчихсон. Тэр үеэс гар урлал тэр дундаа эсгий сийлбэрийг өөрөө санаачлан, өөрөө зохион бүтээж хийсэн. Эсгий сийлбэр хийх багажаа бас өөрөө хийсэн. Баян мод дээр суурилуулсан хос хоёр луу. Эсгийгээр их биеийг хийгээд нүдийг барын нүдэн чулуугаар, эврийг зээрийн эврээр, шүдийг хярсны шүдээр, хоёр өндгийг цахиур чулуугаар хийсэн. Энэ бүтээлийг зургаан сар гаруй хугацаанд хийсэн. Үзэсгэлэнд оролцохын зэрэгцээ "Мишээл экспо" дээр Цагаан сарын үзэсгэлэн худалдаанд оролцож байгаа.
Уран хатгамалч Хандмаа:
1977 онд Дүрслэх урлагийн сургуулийг төгссөн. Чимэглэл, зураач, уран хатгамалч мэргэжилтэй. Сургууль төгссөнөөсөө өнөөдрийг хүртэл тасралтгүй уран бүтээлээ туурвиж явна даа. Монголын Уран хатгамалчдын улсын анхдугаар уралдаанд задгай хатгамлаар дөрвөн жил гаруй урласан "Аюуш бурхан" бүтээлээрэээ Гран-при шагнал хүртэж байсан. Хатгамлын төрлөөр бүтээл хийхээс гадна зоосон ширээний энэ өв соёлыг түгээн дэлгэрүүлэх хүчин зүтгэж яваа.
Аймгийн Хүрмэн, Булган, 1 дүгээр сургууль, Улаанбаатар хотод энэ чиглэлээр багшилж олон сайхан шавь нартай болсон. Манай гэрийн хүн маань 50 гауй зоосон ширээг бүтээжээ. "Нар үдэлсэн говь" энэ сайханд үзэсгэлэнд оролцож байгаадаа маш их баяртай байна. Бид чинь нутгаасаа хол амьдраад нилээдгүй хугацаа өнгөрсөн байна. Энэ үзэсгэлэнд оролцож нутгийнхаа олон урчуудтай уулзаж, Өмнөговийн уран бүтээлч гэдгээ танилцуулж байгаадаа маш их баярлаж байна.
Энэхүү сайхан үзэсгэлэн зохион байгуулж байгаа залуучууддаа, дэмжсэн бүх байгууллагын удирдлага, хамт олонд талархал илэрхийлье.
