Өмнөговь аймагтаа улаан буудайн хөрсгүй тариалалтаар улаан буудайн соёолж тарьж буй Б.Одгэрэлтэй ярилцлаа.
-Та өөрийн эрхэлж буй хөрсгүй тариалалтын талаар манай уншигчдад сонирхуулна уу?
Намайг Б.Одгэрэл гэдэг. Даланзадгад сумандаа ажиллаж амьдардаг. Өнгөрсөн жилээс хөрсгүй тариалалтыг сонирхож мэдээлэл цуглуулж, туршлага судлаж эхэлсэн. Иргэдийн хувьд гэрийн нөхцөлд тариалах нь их байдаг юм билээ. Харин Баянхонгор аймагт малын тэжээлийн тариалж төсөл болгон хэрэгжүүлдэг юм билээ. Эдний судалгааны материалтай танилцаж, тариалалтын туршлагыг нь нилээн их судалсан. Тэгээд Сэлэнгэ аймгаас буудайн үрийг авч өнгөрсөн 11 дүгээр сараас туршилтын тариалалтаа эхлүүлсэн. Одоо 7 хоногт 200 кг буудайн нялх соёолж хурааж авч байгаа. 7 хоногтой нялх соёолж маань хамгийн шимтэй тэжээл болдог төдийгүй улирал хамаарахгүй тариалдгаараа онцлогтой.
-Буудайн соёолж нь хамгийн шим ихтэй тэжээл болдог гэлээ. Малыг хэрхэн тэжээх ёстой бэ?
-Тариалалтаа туршихын зэрэгцээ хэрэглээ тал руу буюу мал тэжээх туршилтаа бас давхар явуулж байгаа. Баянхонгорын туршлагыг судласан, бас малын эмчээс зөвлөгөө авсан. Өөрийн маань хэдэн адуу, мал Номгонд байдаг. Тийшээгээ явуулж малаа тэжээж байгаа. Өөрөө хааяа очно, малчинтайгаа байнга холбогдож үр дүн өгөөж ямар байгааг асууж мэдээлэл авдаг. Түүнээс гадна аймгийн төв дээр надаас тогтмол худалдаж авдаг 2- 3 хэрэглэгч байгаа. 7 хоногтой нялх соёолж бол хамгийн шим тэжээлтэй, уураглаг, шүүслэг, эрдэс бодисоор баялаг байдаг. Долоо хоногоос илүү хоног тариалахаар бол нэмэлт хөрс, бордоо хэрэглэх шаардлагатай болдог. Манай бэлчээрийн малд шинэ тэжээлийн ургамал учир мал өвс шиг шууд дайраад идчихгүй л дээ. Тэгэхээр эхлээд бага, багаар өгч дасгаж байгаад бод малыг 5 кг, бог малыг 1 кг- аар тэжээхэд хангалттай. Малаа таргалуулах шаардлагатай гэж үзвэл хэмжээг нь нэмэгдүүлж өгч болно гэсэн үг.
-Хөрсгүй тариалалт хийх сонирхолтой иргэд нэлээн байх шиг байна. Иргэдэд сургалт, зөвлөгөө өгч байна уу?
-Сүүлийн үед хөрсгүй тариалалтыг хүмүүс маш их сонирхож тариалалт хийж эхлээд байгаа. Зөв хийж байгаа нэг хэсэг ч байна, олигтой ургахгүй байна, зөвлөгөө зөвлөмж өгөөч гэсэн иргэд ирдэг л дээ. Миний хувьд нилээн хугацаанд арга технологийг судлаж, 3 сар гаруй тариалалт хийж байгаа болохоор зориод ирсэн хүмүүст зөвлөгөө өгдөг. Цаашдаа их хэмжээгээр тариалж малчдад нийлүүлэх, тариалах сонирхолтой малчид, иргэд зөвлөгөө өгч говь нутагтаа хөрсгүй тариалалтыг хөгжүүлэхийг зорьж байгаа даа. Одоохондоо бүтээгдэхүүнээ сайн сурталчилж, малчид, иргэдэд сайн таниулж чадаагүй байгаа болохоор ихээр тариалахгүй байгаа. Бүтээгдэхүүнээ сайн сурталчлаад хэрэглэгчтэй болчихвол орлогоороо үрийн нөөцөө бүрдүүлж, хүн хүчээ нэмэгдүүлээд үйлдвэрлэлийн түвшинд явуулахыг зорьж байгаа. Үйл ажиллагаагаа өргөжүүлээд хийвэл 7 хоногтоо 1 тонн буудайн соёолж хураах авах боломжтой. Тариалах байр сав, арга туршлага бол бий.
-Цаг зав гарган ярилцсанд баярлалаа. Хөрсгүй тариалалтыг нутагшуулах их ажилд тань амжилт хүсье.
-Баярлалаа. Та бүхний ажилд амжилт хүсье. Улаан буудайн хөрсгүй тариалалтаар ургуулсан улаан буудайн соёолж худалдан авах, хөрсгүй тариалалтыг сонирхож буй иргэд 88571888 утсаар Б.Одгэрэлтэй холбогдож мэдээлэл зөвлөгөө авах боломжтой.
Малын өвс тэжээл гэхээр л бидний мэддэг хадаж хадгалсан өвч тэжээл гэдэг ойлголт дэлхий дахинд ард хоцорч, одоо арвай буудай, шош, овьёос гээд малд өгдөг бүхий л тэжээлийн үрээ Гидропоник буюу хөрсгүй тариалалтын технологиор ургуулж, соёолуулаад өвөл зунгүй малаа тэжээгээд малын хорогдолгүй тамир тэнхээ сулруулахгүй хаврын хавсрага, өвлийн зудыг өнтэй давдаг болсоон. Сонирхсон хүмүүс нь доор оруулсан линкээр ороод лайв болон бусад мэдээлэл аваарай.
