Хятадын 100 хувийн хөрөнгө оруулалтай Булаг сүүж майнинг компани Өмнөговь аймгийн Номгон сумын нутаг Аягачийн тойром, Буурын хярын ойролцоо чулуун нүүрсний уурхайгаа энэ оны эхээр нээгээд байсан юм. Энэ уурхайн Алтай нурууны төгсгөл хэсэг болох ан амьтан ихтэй Буурын хяр, говийн хүн малын ундаалдаг Аягачийн тойрмын ойролцоо байрладаг бөгөөд дэд бүтэц, ус, зам харилцаа шийдээгүй төдийгүй хуурамч бичиг баримтаар байгаль орчинд нөлөөлөх байдлын нарийвчилсан үнэлгээгээ батлуулсан гээд хууль зөрчин үйл ажиллагаа эхлүүлээд байсан билээ.
Тэгвэл Өмнөговь аймгийн Засаг дарга Н.Наранбаатар Булаг сүүж майнинг компаний ашиглалтын тусгай зөвшөөрлийг цуцлах саналаа ашигт малтмалтын газар хүргүүлж, Ашигт малтмал, газрын тосны газрын, Кадастрын хэлтсийн даргын 2019 оны 08 дугаар сарын 21 ний өдрийн шийдвэрээр Өмнөговь аймгийн Номгон сумын нутаг дахь чулуун нүүрсний ордыг эзэмшигч Булаг сүүж майнинг компаний ашиглалтын тусгай зөвшөөрлийг албан ёсоор цуцалсан байна.
Энэхүү шийдвэрийн дагуу Өмнөговь аймгийн Засаг даргын 8 сарын 21 ний өдрийн А/897 тоот захирамжаар байгуулагдсан ажлын хэсэг энэ сарын 25 ны өдөр Булаг сүүж майнинг компаний үйл ажиллагааг нь зогсоож, хуулийн дагуу нөхөн сэргээлт хийж орон нутагт хүлээлгэж өгөхийг үүрэг болгожээ.
