Өмнөговь аймгийн Даланзадгад сумын 6 дугаар баг шинээр байгуулагдсан буюу Даланзадгад сумын шинэ суурьшлын бүсийн нутаг дэвсгэр хамаардаг, хүн амын суурьшил ихээр нэмэгдэж буй баг юм. Өнгөрсөн жил орон нутгийн төсвийн хөрөнгөөр багийн төв, өрхийн эмнэлгийн цогцолбор баригдаж ашиглалтанд орсон бөгөөд тус багийн удирдлагууд багийн төвийн гадна талбайг тохижуулах ажлаа төрийн мөнгөөр биш багийнхаа залуус, иргэдийн оролцоотойгоор шийдэх санаачилга гаргажээ.
Залуус "Хөгжлийн түүчээ бүтээлч залуус" төрийн бус байгууллага байгуулан багийн гадна задгай театр бүхий урлаг соёл, хурал, уулзалтын арга хэмжээ хийх зориулалттай талбайн зураг төслийг гарган энэхүү талбайгаа “Эв нэгдэл” хэмээн нэрлэж хандивын аян, бүтээн байгуулалтын ажлаа эхлүүлээд байна.
Их уулын 6 дугаар багийн удирдлага, “Хөгжлийн түүчээ бүтээлч залуус” төрийн бус байгууллагын зүгээс Өмнөговь аймгийнхаа иргэд, залуус та бүхнийг “Эв нэгдэл” талбайн бүтээн байгуулалтад гар бие оролцож өөрийн хувь нэмрээ оруулахыг уриалж байна.