Өмнөговь аймгийн Засаг даргын 987 тоот захирамж, Аймгийн Мэргэжлийн хяналтын газрын даргын 16/171 удирдамжийн дагуу МХГ-ын дарга Д.Мөнхтулгаар ахлуулсан ажлын хэсэг есдүгээр сарын 14-15-ны өдрүүдэд Цагаан хаданд ажиллаж гаалийн хяналтын бүсүүдийн үйл ажиллагаанд хяналт шалгалт хийсэн билээ. Өнгөрсөн баасан гаригт аймгийн МХГ-аас Цагаан хаданд гаалийн хяналтын бүсүүдийн үйл ажиллагаа, эрхэлж буй компаниудад энэхүү шалгалтын дүнг танилцуулж, зөрчил, дутагдлыг арилгуулах талаар зөвлөмж, чиглэл өглөө.
Илэрсэн зөрчлийн ихэнх нь гаалийн хяналтын бүсүүд байгаль орчны хамгаалах, сөрөг нөлөөллийг бууруулах чиглэлээр хангалтгүй ажиллаж байгаа төдийгүй хууль бусаар газар авсан, газраа хууль бусаар сунгасан зэрэг ноцтой зөрчлүүд байгааг аймгийн МХГ-ын газраас анхаарууллаа. Үүний дагуу 2019 онд Ханбогд сумын Засаг даргын захирамжаар хууль бусаар Цагаан хаданд олгогдсон “Хар алтан уул” ХХК, “Мөнх түшиг транс” ХХК, "МОЗУТ" ХХК-ийн газар эзэмших эрхийг аймгийн Засаг даргын захирамжаар хүчингүй болгох шийдвэр гаргасан байна. Цаашдаа аймаг, орон нутгийн зүгээс гаалийн хяналтын бүсийн үйл ажиллагаа эрхлэж буй аж ахуйн нэгжүүдийг байгаль орчны сөрөг нөлөөллийг бууруулах, ажилчдын эрүүл мэндийн асуудалд онцгой анхаарч ажиллахыг үүрэг болгож, Цагаан хадны дахин төлөвлөлтийн бүтээн байгуулалтанд аж ахуйн нэгжүүдийг идэвхтэй оролцохыг уриаллаа.
