Жендэрт суурилсан хүчирхийлэл, ялангуяа гэр бүлийн хүчирхийлэл нь Монгол, цаашилбал дэлхийн хэмжээнд хүний амь насанд заналхийлсэн, хүний эрхийн ноцтой зөрчлүүдийн нэг байсаар байна.
Дэлхий дээрх гурван эмэгтэй тутмын нэг нь амьдралынхаа туршид ямар нэг төрлийн хүчирхийлэлд өртдөг гэсэн тоо мэдээ байдаг.
Монгол Улсад гэр бүлийн харилцааны бат бэх тал сайнгүй, салалт их, гэр бүлийн гишүүд болон гэрлэлтийн баталгаагүй хамтран амьдрагч нарын хооронд харилцааны зөрчил түгээмэл, ил болон нууц далд хэлбэртэй янз бүрийн хүчирхийлэл газар авсаар байгаа нь хуулийн байгууллагуудын статистик үзүүлэлтээр батлагдаж байгаа ба гэр бүлийн доторхи хурц асуудал газар авч хүчирхийлэлд өртөж буй эмэгтэйчүүд, хүүхдүүдийн тоо нэмэгдсээр байгаа гэсэн судалгаа бий.
Гэр бүлийн хүчирхийлэлийн хохирогчдыг хамгаалах үүднээс МУ-ын Засгийн газар, аймгийн ЗДТГ, Швейцарын хөгжлийн агентлаг, НҮБ-ын Хүн амын сан, "Говийн оюу" хөгжлийг дэмжих сан, аймгийн Гэр бүл хүүхэд залуучуудын хөгжлийн газар хамтран Даланзадгад суманд хүчирхийлэлд өртсөн хохирогчдод нэг цэгийн үйлчилгээ үзүүлэх төвийг шинээр нээлээ.
Энэ төв хүчирхийлэлд өртсөн эмэгтэйчүүд, хүүхдүүдийг түр хугацаагаар байрлуулж, эрүүл мэнд болон сэтгэл заслын үйлчилгээг үзүүлж, гэр бүлийн хүчирхийллийг таслан зогсоох, хохирогч хамгааллын тогтолцоог бий болгох, цаашлаад жендэрт суурилсан хүчирхийллийн эсрэг тэмцэх аргуудын нэг ажээ.