Монгол улсын Өмнөговь аймаг, ӨМӨЗО-ны Баяннуур аймаг хамтран ажиллах санамж бичиг байгуулсан. Өмнөговь аймгийн Засаг даргын орлогч С.Мөнхбаяр тэргүүтэй холбогдох албаны хүмүүс ӨМӨЗО-ны Баяннуур аймгийн удирдлагуудтай уулзаж санамж бичгийн хэрэгжилт, 2019 онд хийж хэрэгжүүлсэн ажлаа дүгнэлээ. Хамтын ажиллагааны хүрээнд өнгөрсөн онд Өмнөговь аймгийн салбар бүрийн төлөөлөл 310 иргэн БНХАУ-ын ӨМӨЗО-нд туршлага судалсан байна. Гашуун сухайт боомтод бүтээн байгуулалт, дэд бүтцийн ажлууд хийгдсэн.
2020 онд нүүрс тээвэрлэлтийг нэмэгдүүлнэ. Тээвэрлэлттэй холбоотой Хятад талаас байгаль орчны стандарт мөрдүүлнэ, тээврийн хэрэгслийн бүрэн бүтэн байдалд онцгой анхаарна гэдгээ энэ үеэр онцолж байв.
Ханбогд сумын Хайрхан багт 24 айлын орон сууцыг барьж 2020 оны 6 дугаар сард дуусгаж ашиглалтад оруулна. Цагаан хад суурьшлын бүсийг тог цахилгаантай болгоно.
Мөн Өмнөговьчуудыг БНХАУ-ын ӨМӨЗО-ны Баяннуур хотод урт болон богино хугацааны туршлага судлах сургалт үйл ажиллагаанд оролцуулна. Өмнөговь аймгийн төв Даланзадгад хотноо хоёр аймгийн хамтарсан ногоон байгууламж бүхий нэрэмжит талбайг байгуулна. Жижиг дунд үйлдвэрлэл эрхлэгчдийг дэмжсэн ажлуудыг хамтарч хэрэгжүүлэхээр боллоо.