“Ачуут гол” эмнэлгийн захирал Б.Машбат Өмнөговь аймагт уламжлалт анагаах ухааныг хөгжүүлэхэд хувь нэмрээ оруулж томоохон бодит ажлуудыг хэрэгжүүлээд байгаа билээ. Тухайлбал, "Өмнөговь-Уламжлалт анагаах ухаан"-1, 2, 3 төслүүдийг амжилттай хэрэгжүүлж аймаг орон нутгийн олон иргэдийн уламжлалт анагаах ухааны эрүүл мэндийн үзлэгт үнэгүй хамруулж заавар, зөвлөгөө аргыг зааж өгч байсан. Тодруулбал, 2019 онд 10 суманд “Уламжлалт анагаах ухааны явуулын үзлэг” зохион байгуулж 1200 хүнд үнэ төлбөргүй үзлэг хийж, 20 гаруй хүний "Ачуут гол" эмнэлэгт үнэ төлбөргүй курс эмчилгээнд хамруулах эрхийг олгосон билээ.
Тэгвэл дээрх үзлэг 2020 онд ч мөн үргэлжилж Хүрмэн, Номгон суманд ажиллаж нэг сая орчим төгрөгийн томуугийн үед нэн шаардлагатай эм танг Эрүүл мэндийн төвүүдэд хандивласан байна. Энэ сарын 16-нд Аймгийн Засаг дарга, НБХ, Эрүүл мэндийн газрын дарга нартай уулзалт хийж, бодлогын түвшинд хийх томоохон ажлуудын саналыг дэвшүүлэн, уламжлалт анагаах ухаан сэргээн засах төвийн барилгыг 2020 оны төсвийн тодотголд оруулах, НҮБ-ын ХАС-аас хэрэгжиж буй "Явуулын үзлэгийн баг"-т уламжлалтын эмч нарыг оруулах гэсэн бодит ажлуудыг хэрэгжүүлэх шийдвэрүүд гаргалаа.
Мөн Даланзадгад сумын иргэдэд хүрч үйлчлэх үзлэг энэ сарын 16-наас эхлэн долоо хоног үргэлжлэх ба үзлэгийг "Ивээл эмнэлэг"-ийн гурван давхарт хийж байгаа гэнэ.