Эдийн засгийн бодлого, өрсөлдөх чадварын судалгааны төвөөс "Аймгуудын өрсөлдөх чадварын тайлан 2019" -ын үр дүнг танилцууллаа. Аймгуудын өрсөлдөх чадварыг хэмжихдээ эдийн засгийн тамир тэнхээ, засаглалын үр ашиг, бизнесийн үр ашиг, дэд бүтэц гэх үндсэн дөрвөн бүлгийн статистик мэдээлэл болон санал асуулга нийлсэн нийт 176 шалгуур үзүүлэлтийг нэгтгэн тооцжээ. Энэхүү тайланг 2012 оноос гаргаж эхэлсэн байна. Өрсөлдөх чадюар хамгийн сайн аймаг нь 100 оноотой байх ба бусад аймгуудыг үүнтэй харьцуулдаг.
Судалгааны зорилго нь Монгол Улсын 21 аймгийн хөгжлийн түвшинг харьцуулан үнэлэх, аймгуудын өрсөлдөх чадварыг цогц байдлаар тодорхойлох явдал юм. Судалгаагаар аймаг бүрийн хөгжлийн давуу ба сул талыг тогтоож, өрсөлдөх чадварын боломж, чадавхийг үнэлэн тогтвортой, урт хугацааны хөгжлийн бодлого боловсруулахад ашиглахуйц өргөн хүрээний мэдээллийн санг бүрдүүлж байгаа аж.
Эдийн засгийн бодлого, өрсөлдөх чадварын судалгааны төвийн дэд захирал И.Одончимэг судалгааны тайлангаас онцлох үзүүлэлтүүдийг танилцууллаа. Тэрбээр "2012 онд аймгуудын өрсөлдөх чадварын дундаж оноо 62 байсан бол өнгөрсөн онд 68 болж өссөн. Мөн хамгийн өндөр болон хамгийн бага оноотой аймгуудын хоорондын зөрүү 2012 онд 27.65 байсан бол өнгөрсөн онд 37.35 болсон. Удаан ч гэсэн аймгууд дээр хөгжил дэвшил явагдаж байна. Аймгуудын хоорондын хөгжлийн ялгаа багасаж байна. Энэ жилийн хувьд өрсөлдөх чадвараар Орхон аймаг дахин тэргүүлсэн бол удаах байруудад Өмнөговь, Дорноговь, Дархан-Уул, Дорнод аймгууд орсон. Харин сүүлийн байруудад Говь-Алтай, Архангай, Булган аймгууд эрэмблэгдсэн. Өрсөлдөх чадварыг хэмждэг үндсэн дөрвөн бүлгээр үзвэл эдийн засгийн тамир тэнхээгээр Өмнөговь, засаглалын үр ашгаар Сүхбаатар, бизнесийн үр ашгаар Дархан-Уул, дэд бүтцээр Орхон аймгууд тус тус тэргүүлсэн" гэв.
НАЙМАН АЙМАГ ӨРСӨЛДӨХ ЧАДВАРЫН ОНООГОО САЙЖРУУЛЖ ЧАДСАН
Аймгуудын өрсөлдөх чадварын дундаж оноо өнгөрсөн жилээс 2 оноогоор буурчээ. Аймгуудын дундаж онооноос харахад эдийн засгийн тамир тэнхээ, засаглалын үр ашиг, бизнесийн үр ашиг бүлгүүдийн оноо буурсан бол дэд бүтэц бүлгийн тоо өссөн байгаа нь судалгаагаар харагджээ.
Өрсөлдөх чадварын ерөнхий үнэлгээ 2019
Аймгуудад гарсан өөрчлөлтийн талаар судлаач н.Ганбат “Аймгуудын өрсөлдөх чадварын дундаж оноо жилээс жилд өсөх хандлагатай байна. 4 шалгуураас хамгийн тогтвортой байгаа бүлэг нь дэд бүтэц бөгөөд өсөх хандлагатай. Эсрэгээрээ хамгийн тогтворгүй өөрчлөлтүүд их байдаг бүлэг нь засаглалын үр ашиг юм. 2019 оны тайлангаас харахад Монголын 8 аймаг өрсөлдөх чадварын оноогоо сайжруулж чадсан бол 12 аймгийн оноо буурсан. Хамгийн их өөрчлөлт гарсан аймгууд нь Дорноговь, Ховд, Дорнод аймаг байв” хэмээн ярилаа.
