Монгол улсын нүүрсний экспортын гол цэг бол Гашуунсухайт боомт ачаалал ихтэй боомтуудын нэг. Өнөөдрийн байдлаар Тавантолгой ордоос Өвөрмонголын Ганц мод боомт хүртэл 14 мянган тээврийн хэрэгслээр нүүрсний экспорт хийж байгаа билээ.
Засгийн газраас нүүрс тээвэрлэлтийн горимд зохицуулалт хийдэг ч хөдөлгөөний ачаалал төдийлөн буурдаггүй бөгөөд 2017 оны эцсээр Засгийн газраас 320 дугаар тогтоолыг гаргаж нүүрс тээврийн урт, богино горимоор явуулж, богины тээврийг шороон замаар хийх боломжийг олгосон юм. Энэ тогтоолыг хэрэгжүүлэх ажлын хүрээнд 2018 онд Өмнөговь аймгийн удирдлага, Өмнөговь аймгийн Авто тээвэрчдийн нэгдсэн холбоо, Ханбогд сумын “Ханбогд хот тохижилт” ОНӨАТҮ-тай хамтран богинын тээвэрт зориулсан шороон замыг ашиглалтанд оруулж, замын ачааллыг бууруулж, ачаа эргэлтийн нэмэгдүүлсэн юм.
Энэхүү ажлын үргэлжлэл болгож, Өмнөговь аймгийн Авто тээвэрчдийн нэгдсэн холбооноос орон нутгийн удирдлагатай зөвшилцсний дагуу нүүрсний экспорт, ачаа эргэлтийг нэмэгдүүлэх, нүүрс тээврийн авто машинуудын хөдөлгөөний ачаалал, түгжрэл, аваар ослыг бууруулах зорилгоор “Шинэ замын төсөл хэрэгжүүлж эхэллээ. Энэ төслийн хүрээнд Цагаан хадны гаалийн хяналтын бүсүүдийн хоёр талаар зөвхөн богинын тээвэрт зориулагдсан зам барьж ашиглалтанд оруулах юм. Төслийн эхний шатанд Цагаан хадны зүүн бүсэд байрлаж буй гаалийн хяналтын талбайнуудад зориулагдсан 7,8 км 13 метрийн өргөнтэй 2 урсгалтай сайжруулсан шороон замыг ашиглалтанд орууллаа. Энэхүү зам ашиглалтанд орсноор ЗГ-ын 320 дугаар тогтоол болон урт богинын тээвэр гэсэн маршрутыг дагаж мөрдөхөд дөхөм болохын зэрэгцээ цагаан хаданд үүсдэг авто машины эмх замбараагүй байдал, оочер дараалал үгүй болж, автомашины түгжрэл буурах боломжтой болж байгаа юм. Түүнчлэн баруун гаалийн хяналтын бүсүүдэд хамаарах богинын тээврийн шинэ замын бэлтгэл ажил эхэлжээ.