Энэ жилийг Өмнөговь аймаг Өрх гэр бүл, Боловсролыг дэмжих жил болгон зарлан боловсролын салбарт болон өрх гэр бүлийг дэмжсэн, олон төсөл хөтөлбөрүүдийг хэрэгжүүлж, томоохон бүтээн байгуулалтын ажлыг хийхээр төлөвлөжээ. Үүний нэг нь Буянт хотхон хүүхдийн зуслангийн шинэчлэл, бүтээн байгуулалтын ажил. Амрагч хүүхэд багачуудын ая тухтай амрах нөхцлийг бүрдүүлэх, зуслангийн үйл ажиллагааг олон улсын жишигт хүргэх зорилгоор орон нутгийн төсвийн 3,3 тэрбум төгрөгийн хөрөнгбүтээн байгуулалт хийгдэхээр болсон байна.
Энэ хүрээнд Буянт хотхон хүүхдийн зусланд нэг зэрэг 250хүн хүлээн авах хүчин чадалтай зоогийн газар, олон улсын чанар стандартад нийцсэн задгай театр, халуун ус, нийтийн жорлонг барьж байгуулах бөгөөд хамгийн тулгамдсан асуудал болсон төвийн цахилгааны эрчим хүчний системд холбох ажил хийгдэнэ. Дашрамд дурьдахад 63 жилийн түүхтэй Буянт хотхон хүүхдийн зуслан өнөөдрийг хүртэл байнгын цахилгаангүй, мотор асааж, өдөрт цөөхөн цагаар цахилгаанаар хангагдаж байжээ.