Монголын эдийн засгийн гол гарц Гашуунсухайт боомт, Цагаан хад сууршилын бүс нутаг гэрэл цахилгаангүй, хөгжлөөс хоцрогдсон газар гэдгийг хүн бүхэн мэднэ. Хөгжихгүй байгаагийн гол шалтгаан нь энэ бүс нутгийг хөгжүүлэх төрийн бодлого үгүйлэгдэж, 30 гаруй жил тог цахилгаангүй, иргэд газар эзэмших эрхгүй байсных нь гэж хэлж болно.
2017 оны 8 дугаар сард Ж.Эрдэнэбатын тэргүүлсэн Засгийн газраас Цагаан хад дахь гаалийн хяналтын бүсийн үйл ажиллагааг бүрмөсөн хаах шийдвэр гаргаж байсан билээ. Засгийн газрын энэхүү шийдвэр нь үндэсний аж ахуйн нэгжүүд дампуурх, олон мянган жолооч нарыг ажлын байргүй болгох нөхцлийг үүсгээд байсан юм.
Олон олон эсэргүүцэлтэй тулгарсны эцэст 2017 оны 11 дүгээр сард У.Хүрэлсүхийн тэргүүлсэн Засгийн газраас нүүрс тээвэрлэлтийн горимыг урт, богино гэсэн хэлбэрээр явуулахаар 320 дугаар тогтоолыг гаргаж өнөөдрийг хүртэл хэрэгжүүлж байгаа билээ.
Энэхүү тогтоол хэрэгжсэний үр дүнд Цагаан хаданд 100 гаруй аж ахуйн нэгж, бизнес эрхлэгчдийн бизнесийн үйл ажиллагаа сэргэж, олон мянган хүн ажлын байртай болж Монгол Улсын эдийн засагт тодорхой хувь нэмрээ оруулж байгаа төдийгүй гаалийн хяналтын бүс өөрийн талбайгаас экспортонд гарч буй нүүрсний тонн тутмаас 100 төгрөгийн хураамжийг орон нутагтаа төвлөрүүлж Цагаан хадны хөгжил, бүтээн байгуулалтанд зарцуулах санаачилга гаргасан юм.
Энэхүү ажлаа 2019 оны 5 дугаар сараас хэрэгжүүлж эхэлсэн бөгөөд өнгөрсөн хугацаанд 2. тэрбум төгрөгийн хөрөнгө төвлөрүүлж, энэхүү хөрөнгөөр Цагаан хадны хог хаягдлыг менежментийг эхлүүлэн, хог хаягдлын машин техникээр хангаж, 16.5 км цахилгааны агаарын шугам татах, 7,5 км хайрган хучилттай замын болон худалдаа, үйлчилгээ, гэр хорооллын цахилгааны зураг төсвийн ажлыг хийж гүйцэтгэхэд зарцуулжээ. Ингэснээр 30 гаруй жил тог цахилгаангүй байсан Цагаан хад эрчим хүчний системд холбогдох боломжтой болж Цагаан хад хөгжих суурь тавигдлаа.
Мөн нүүрс тээврийн жолооч, оршин суугч иргэдэд эрүүл мэндийн үйлчилгээ ойртуулж, Цагаан хаданд түр эмнэлгийн байр бий болгож байнгын эмч ажиллуулахын зэрэгцээ банкны салбар байдаггүй Цагаан хаданд төлбөр тооцооны Гэрэгэ киоскийг байрлуулж иргэд, оршин суугчдын тулгамдсан асуудлыг шийдвэрлэжээ.
Энэ бүхнээс харахад төр засгийн шийдвэр оновчтой, тогтвортой бол аж ахуйн нэгжүүд, аймаг оронтой нутагтай хамтран бүс нутгийг хөгжүүлэх боломж бий гэдэг нь харагдаж байна.
Дашрамд дурдахад өнгөрсөн оны 5 дугаар сард аймгийн Засаг даргын захирамжаар ажлын хэсэг байгуулагдан Цагаан хадны нүүлгэн шилжүүлэлт, дахин төлөвлөлтийг хийж Цагаан хаданд иргэдийг газар эзэмших эрхийг нээсэн юм. Тог цахилгаантай болж, иргэд газар эзэмших эрхтэй болсноор стандартны барилга байшин баригдаж Цагаан хад орчин үеийн томоохон суурин болж хөгжих боломж бүрдэж байна.