2020 оны 10 дугаар сард болж өнгөрсөн орон нутгийн сонгуулиар Өмнөговь аймгийн ИТХ-д Ардчилсан нам 20 суудлыг авч олонхийг бүрдүүлсэн билээ. Олонхийг бүрдүүлж буй АН-аас намын дарга Р.Сэддоржийг аймгийн Засаг даргад нэр дэвшүүлж, Ерөнхий сайд томилсон юм. Харин Засаг дарга Р.Сэддорж 11 сарын өдөр 27 ний өдөр захирамж гаргаж ЗДТГ-ын даргаар АН-ын гишүүн Ц.Батхүүг томилжээ. Тамгын газрын даргаар томилогдсон Ц.Батхүү нь өнгөрсөн нэг сарын хугацаанд хэд хэдэн хэлтсийн даргыг ажлаас чөлөөлж, оронд АН-ын гишүүдийг томилжээ.
Энэхүү асуудалд төрийн албаны зөвлөл хяналт шалгалт хийж, шалгалтын дүнг 1 сарын 13 ний өдөр хуралдсан ээлжит хурлаар хэлэлцэж, Ц.Батхүүг хуулийн дагуу сонгон шалгаруулалтгүйгээр шууд томилон ажиллуулж байгаа нь төрийн албаны хуулийг зөрчсөн үйлдэл гэж үзэж энэхүү шийдвэрээ 1 сарын 27 ны дотор хүчингүй болгож, төрийн албаны хуулийн дагуу сонгон шалгаруулалтыг явуулахыг Засаг даргад Р.Сэддоржид үүрэг болгожээ.
Хэрвээ аймгийн Засаг дарга Р.Сэддорж заасан хугацаанд ЗДТГ-ын газрын даргыг томилсон хууль бус шийдвэрээ хүчингүй болгохгүй бол Төрийн албаны зөвлөл өөрөө уг шийдвэрийг хүчингүй болгож, сонгон шалгаруулалтыг хуулийн дагуу явуулахаас гадна хууль бус шийдвэр гарган хэрэгжүүлж буй аймгийн Засаг даргыг үүрэгт ажлаас нь чөлөөлөх хүсэлтийг Ерөнхий сайдад хүргүүлнэ гэдгээ мэдэгджээ. Тэгэхээр Өмнөговь аймгийн Засаг дарга Р.Сэддоржийн хувьд ЗДТГ-ын дарга Ц.Батхүүг томилсон шийдвэрээ хүчингүй болгох эсвэл өөрөө хариуцлага тооцуулж, Засаг даргын үүрэгт ажлаасаа чөлөөлөгдөх уу гэдэг сонголтын өмнө иржээ.
