Засгийн газрын хэрэгжүүлэгч агентлаг Газар зохион байгуулалт, геодези зураг зүйн газраас 21 аймгийн Газрын харилцаа, барилга, хот байгуулалтын газар, Нийслэл, дүүргийн газар зохион байгуулалтын албаны дарга нарын “Удирдах ажилтны зөвлөгөөнөө 2021 оны 2 сарын 5-ны өдөр цахимаар зохион байгууллаа. Зөвлөгөөний үеэр 2020 онд салбарын хэмжээнд хэрэгжүүлсэн томоохон ажлуудаа тайлагнан дүгнэж, “Шилдэг байгууллага”, “Шилдэг менежер”, “Шилдэг нэгж”, “Шилдэг ахлах мэргэжилтэн”, “Шилдэг ажил”, “Шилдэг газрын даамал”-ыг тодруулжээ.
Шалгаруулалтаар 2020 онд Өмнөговь аймгийн Засаг даргын захирамжаар Цогтцэций сумын Сийрст багийн нутаг дэвсгэр дэх хууль бус суурьшил, Ханбогд сумын Хайрхан багийн нутаг дэвсгэр Цагаан хад суурьшлын бүсийн нүүлгэн шилжүүлэлт, дахин төлөвлөлтийн ажил улсын хэмжээнд оны “Шилдэг ажил"-аар шалгарсан байна.
Энэхүү газар чөлөөлөлт, нүүлгэн шилжүүлэлтийн ажлыг Аймгийн Газрын харилцаа, хот байгуулалтын газрын дарга Ю.Энхтуяагаар ахлуулсан ажлын хэсэг зохион байгуулж Цогтцэций сумын Сийрст багийн нутаг дэвсгэр 14 жилийн турш эвдэж сүйтгэгдсэн 750 га газрыг чөлөөлж, 2500 тонн хаягдлийг технологийн дагуу булж, 300 гаруй гэр гуанз, 85 сэндвэчин байшин, 10 модон байшин, 8 вагончиг, 10 шатахуун түгээх станц, 110 чингэлэг, 680 шланз зэргийг нүүлгэн шилжүүлж төмөр замын дагуух газар чөлөөлөлтийг хийжээ. Мөн Хайрхан багийн нутаг дэвсгэр Цагаан хаданд дахин төлөвлөлтийн ажлыг эхлүүлж, 238 аж ахуйн нэгж, иргэдийн 1206 тээврийн хэрэгсэл, 700 гэр гуанз, 13 чингэлэг, шавар байшин, 200 гаруй сэндвчин байшинг нүүлгэн шилжүүлж, 114 га газраас 15987 м3 хог хаягдлыг цэвэрлэж технологийн дагуу булжээ.
Энэ ажлын хүрээнд Цагаан хаданд анх удаа газар зохион байгуулалт, хаягжилтын ажил хийгдэж, 321 иргэнд 6,2 га газрыг гэр бүлийн хэрэгцээнд, 126 иргэнд 2,5 га газрыг худалдаа үйлчилгээний зориулалтаар эзэмшүүлжээ.
