Тэрээр “Code Olympiad 2023” олон улсын мэдээлэл зүйн олимпиадын 11-13 насны ангиллын тоглоом хөгжүүлэлт 1C хэсэгт тэргүүн байр эзэлсэн байна. Э.Тэнүүн Цахим говь ТББ-ын дэргэдэх Робот урланд кодингийн анхан шатны сургалтад хамрагдаж буй сурагч бөгөөд "Тогтвортой хөгжил" сэдэвт энэ удаагийн олимпиадад Scratch 3.0 ашиглан хог хаягдлыг ангилан ялгах тоглоом бүтээж өрсөлдсөн юм.
"Code Olympiad" олимпиадыг 2017 оноос Индонезийн Coding Bee Академиас зохион байгуулж эхэлжээ. Энэ жилийн олимпиад Ази Номхон далайн орнуудын "Asia Code Week" арга хэмжээний нэг хэсэг нь болсноороо онцлогтой. Олимпиадад Индонез, Сингапур, Малайз, Монгол, Энэтхэг, Пакистан зэрэг 12 орны 5-18 насны 1000 гаруй хүүхэд бүртгүүлж, гар утасны аппликэйшн хөгжүүлэлт болон тоглоом хөгжүүлэлт гэсэн 2 ерөнхий хоёр төрлөөр нас насны ангилалд өрсөлдсөн байна.
Э.Тэнүүн 11-13 насны ангилалд тоглоом хөгжүүлэлт төрөлд өрсөлдөж, өөрийн бүтээсэн тоглоомоо 4-р сарын 15-нд болсон онлайн эвент дээр олон улсын шүүгчдийн өмнө англи хэлээр танилцуулсан юм. Танилцуулгын дараах асуулт хариултын хэсэгт ч Э.Тэнүүн маань тун амжилттай оролцсон. Эцэст нь шүүгчдийн нэгдсэн дүнгээр өөрийн насны ангилалд тэргүүн байранд шалгарч чадсан юм. Түүний энэхүү амжилт хөдөө орон нутгийн хүүхэд залууст ч өсөж хөгжих, олон улсад өрсөлдөх боломж байгааг тод харуулж чадлаа.
Дашрамд дурдахад, Цахим говь ТББ нь 2018 оноос хойш Өмнөговь аймгийн Даланзадгад суманд хүүхэд залуучуудын технологийн боловсролыг дээшлүүлэх чиглэлд төсөл хөтөлбөр хэрэгжүүлж ирсэн юм. Тус байгууллагын дэргэдэх "Робот урлан" роботик-электроникт суурилсан олон улсын STEM сургалт явуулдаг бөгөөд энэ жилээс компьютерт суурилсан кодинг сургалт явуулж эхэлжээ. 2022 онд тус байгууллага Women in Tech олон улсын байгууллагаас "Азийн шилдэг санаачилга" шагналыг хүртсэн. 2023 оны 5 дугаар сарын 21-23-нд Парист болох Women in Tech үйл ажиллагаанд уригдаад байгаа юм.
