МОНГОЛ УЛСЫН ХӨДӨЛМӨРИЙН БААТАР, ГАВЪЯАТ МЕХАНИКЖУУЛАГЧ Ц.ШАТАРЫН МЭНДЭЛСНИЙ 100 ЖИЛИЙН ОЙГ ТЭМДЭГЛЭН ӨНГӨРҮҮЛЛЭЭ.

Монгол Улсын Хөдөлмөрийн баатар, Хөдөө аж ахуйн анхны гавъяат механикжуулагч Ц.Шатар агсаны  үр хүүхдүүдээс түүний мэндэлсний 100 жилийн ойг тэмдэглэн өнгөрүүлэх хүсэлт гаргасны дагуу  Өмнөговь аймгийн ИТХ-ын даргын 2022 оны 156 дугаар захирамжаар Хөдөлмөрийн баатар Ц.Шатарын  мэндэлсний 100 жилийн ойг 2023 онд тэмдэглэн өнгөрүүлэхээр шийдвэрлэсэн билээ. Энэхүү шийдвэрийн дагуу аймгийн ИТХ, ЗДТГ, Хөдөлмөрийн баатар Ц.Шатарын үр хүүхдүүд хамтран  Хөдөлмөрийн баатар, анхны гавьяат механикжуулагч Ц.Шатарын мэндэлсний 100 жилийн ойг 2023 оны 7 сарын 22, 23 ны өдөр Даланзадгад хотод ёслол төгөлдөр тэмдэглэн өнгөрүүллээ. Ойн арга хэмжээнд аймгийн төр захиргааны байгууллагын төлөөлөл, түүний үр хүүхдүүд, ахан дүүс, Шатар баатартай хамт ажиллаж байсан хүмүүс, хөдөө аж ахуйн салбарынхан уригдан оролцжээ. Энэ үеэр Шатар баатарын үр хүүхдүүд түүний ажил амьдралыг харуулсан “Шатар баатар” хэмээх баримтат кино, ном, түүний цээж барималыг бүтээсэн байна.

 Хөдөлмөрийн баатар Цэдэвийн Шатар нь 1923 онд  Өмнөговь аймгийн Хүрмэн суманд төрсөн  бөгөөд 1939 оноос Улаанбаатар хот дахь Хөдөө аж ахуйн техникумд суралцаж механикч мэргэжил эзэмшжээ. Тэрээр 1943 оноос Төв аймгийн Жаргалант, Өвөрхангай аймгийн Хархорин, Архангай аймгийн Төвшрүүлэхийн сангийн аж ахуйд механикч, ерөнхий механикчаар, 1980 оноос Өмнөговь аймгийн Ханхонгор сум дахь Хөдөө аж ахуйн механикжуулалт, цахилгаанжуулалтын эрдэм шинжилгээний станцын явуулын бригадын даргаар ажиллаж байжээ.  40 гаруй жил сангийн аж ахуйд хөдөө аж ахуйн машин, механизмуудын бүрэн бүтэн байдал, хэвийн жигд ажиллагааг хангах ажлыг хариуцан ажилласаны сацуу олон шинэ бүтээл, оновчтой технологийг үйлдвэрлэлд нэвтрүүлсний дотор трактор, комбайны 140 гаруй төрлийн сэлбэг хэрэгслийг Хархорины сангийн  аж ахуйн засварын цехэд үйлдвэрлэж,  монгол улсын бүх сангийн аж ахуйд нийлүүлэх ажлыг хийж хэрэгжүүлсэн гавьяатай хүн юм. Тэрээр 1962 онд Өвөрхангай аймгийн Хархорины сангийн аж ахуйн засварын механикаар ажиллаж байхдаа буюу 39 насандаа Монгол Улсын Хөдөлмөрийн баатар цолыг хүртсэн бол 1974 онд Хөдөө аж ахуйн гавьяат механикжуулагч цолыг хүртжээ. Мөн Ардын Их Хурлын депутатаар сонгогдож, МАХН-ын их хуралд төлөөлөгчөөр оролцож, Намын Төв Хорооны орлогч гишүүнээр сонгогдон ажиллаж байсан эрхэм билээ.

Ц.Шатар нь Монгол оронд атар газар эзэмших, сангийн аж ахуйг байгуулах суурийг тавьж, газар тариалан, сангийн аж ахуйг  хөгжүүлэхэд онцгой үүрэг гүйцэтгэсэн гавьяатан төдийгүй говь нутагт усалгаатай газар тариаланг хөгжүүлж, малчдын хөдөлмөрийг хөнгөвчилж, олон шинэ техник, технологийг санаачлан үйлдвэрлэлд нэвтрүүлсэн нь одоо ч хөдөө аж ахуйн салбарт ашиглагдаж байна.  Түүний үр хүүхдүүд аавынхаа мэндэлсний 100 жилийн ойд зориулан бүтээсэн “Шатар баатар” номыг аймгийн удирдлага болон төвийн номын сан, түүний цээж барималыг аймгийн музейд дурсгал болгон  өгсөн бөгөөд энэ үеэр уг номын зохиолч Монголын зохиолчдын эвлэлийн шагналт зохиолч О.Энхжавхлан  “Шатар баатар” -ын өөрийнх нь 200 гаруй тэмдэглэлийн дэвтэр, баримт бичиг, хэвлэлд нийтлэгдсэн ярилцлага, сурвалжлагад тулгуурлан гайхамшигт түүхэн хүмүүний алдар гавьяаг мөнхөлсөн номон суварга босгосноо номын нээлтийн үеэр танилцууллаа.