Өмнөговь аймаг эдийн засгийн олон тулгуурт бодлогыг хэрэгжүүлж төр, хувийн хэвшлийн түншлэлийн хүрээнд үйлдвэрүүдийг байгуулахын зэрэгцээ, иргэд, жижиг дунд үйлдвэрлэл эрхлэгч, бизнес эрхлэгчдэд хөнгөлөлттэй зээл олгож үйлдвэрлэлийг нэмэгдүүлэх бодлогыг үе шаттайгаар хэрэгжүүлж ажиллаж байна. Даланзадгад суманд 100 га газарт орон нутгийн төсвийн хөрөнгө оруулалтаар дэд бүтцийн бүтээн байгуулалтыг хийж үйлдвэрлэлийн бүс бий болгон аж ахуй нэгжүүдэд газар олгож, төр хувийн хэвшил хамтран үйлдвэрүүдийг байгуулж байна. Мөн орон нутгийн төсвийн хөрөнгөөр жижиг дунд үйлдвэрлэл эрхлэгчдийг дэмжих бодлогыг хэрэгжүүлэн бизнес эрхлэгчдэд 5 хүртэлх жилийн хугацаатай, жилийн 3 хувийн хүүтэй, эхний 12 хүртэл сар үндсэн зээлээс хөнгөлөгдөх боломжтой хөнгөлөлттэй зээлийг олгожээ. Тоо мэдээллээс үзэхэд тус аймгийн хэмжээнд 2022 онд 5 тэрбум , 2023 онд 4 тэрбум, 2024 онд 1 тэрбум төгрөгөөр 87 аж ахуй нэгжүүдэд хөнгөлөлттэй зээл олгож бизнесээ эхлүүлэх, өргөжүүлэх боломжийг олгожээ. Ингэснээр 480 шинэ ажлын байр нэмэгдсэн бол 176 ажлын байрыг хадгалах боломжоор хангаад байна.
2025 онд нийт 5 тэрбум төгрөгийг жижиг дунд үйлдвэр, үйлчилгээний чиглэлээр бизнес эрхлэгчдэд хөнгөлөлттэй зээл олгохоор төлөвлөж төсөл хүлээж авахаар зарлажээ. Зээлийн хүсэлт, төсөл хүлээж авах үйл ажиллагаа эхэлсэнтэй холбогдуулан Өмнөговь аймгийн Засаг даргын санаачилгаар “Өсөлттэй Өмнөговь-Өсөлттэй жижиг дунд үйлдвэрлэл” зөвлөгөө, мэдээлэл өгөх уулзалт, арга хэмжээг 03-р сарын 21-ний өдөр Даланзадгад хотод зохион байгууллаа. Энэхүү арга хэмжээнд 250 гаруй бизнес эрхлэгч, үйлдвэрлэгчид оролцож, Өмнөговь аймгийн Засаг дарга Н.Энхбат, ХХААХҮЯ-ны Жижиг дунд үйлдвэрийн газрын ТЗУХ-ын дарга Б.Цэнд, Экспорт, олон улсын худалдааны төв” ТББ-ын менежер А.Эрдэнэжаргал, Хөгжлийн шийдэл” ТББ-ын Гүйцэтгэх захирал П.Амармэнд, Бизнес зөвлөх Ё.Энх-Амгалан, Б.Мөнгөнбагана нар орон нутгийн бизнес эрхлэгчдийг дэмжих бодлого, бизнес төсөл боловсруулах аргачлал, Уул уурхай ба жижиг дунд үйлдвэрийн хамтын ажиллагаа, экспортод бүтээгдэхүүнээ гаргах боломжийн талаар мэдээлэл, зөвлөгөө өглөө.
Уг арга хэмжээнд жижиг дунд үйлдвэрлэлд зориулсан хөнгөлөлттэй зээл авч, үйлдвэрлэл хөгжүүлж, орон нутгийн брэнд үүсгэж чадсан бизнес эрхлэгчид оролцож өөрсдийн туршлагаа хуваалцан, бүтээгдэхүүний дээжээ танилцуулан оролцлоо. Энэхүү арга хэмжээний үргэлжлэл болгож 3 сарын 24-ны өдрөөс зээлийн материал хүлээж авах хугацаа хүртэл бизнес эрхлэгчдэд материал бүрдүүлэх, төсөл бичих, эдийн засаг үр ашгийн тооцоолол зөв хийх чиглэлээр зөвлөн туслах үйлчилгээ үзүүлэх “ Зөвлөе, тусалъя” нэг цэгийн үйлчилгээ 14 хоногийн хугацаанд зохион байгуулахаар төлөвлөжээ.
