БНМАУ-ын Ардын Их Хурлын Тэргүүлэгчдийн дарга, БНМАУ-ын хөдөлмөрийн баатар, төр нийгмийн нэрт зүтгэлтэн Жамсрангийн Самбуугийн мэндэлсний 130 жилийн ойг тэмдэглэн өнгөрүүлэх ажлын хэсгийн хурал өнөөдөр боллоо.
Монгол Улсын Засгийн газрын 2025 оны 2 дугаар сарын 12-ний өдрийн 82 дугаар тогтоолоор Монгол Улсын төр, нийгмийн зүтгэлтэн Жамсрангийн Самбуугийн мэндэлсний 130 жилийн ойг тэмдэглэн өнгөрүүлэх тухай шийдвэр гарсан. Тус тогтоолоор ойг 2025 онд тэмдэглэн өнгөрүүлэхээр тогтож, ойн хүрээнд ажил зохион байгуулах ажлын хэсгийг Монгол Улсын сайд, Засгийн газрын хэрэг эрхлэх газрын дарга Н.Учралаар ахлуулан бүрэлдэхүүнийг баталсан ба Өмнөговь аймгийн Засаг дарга Н.Энхбат тус ажлын хэсэгт орж ажиллаж байна.
2025 оны 3 дугаар сарын 27-ны өдөр ажлын хэсгийн анхны хурал хуралдаж төр нийгмийн нэрт зүтгэлтэн Жамсрангийн Самбуугийн мэндэлсний 130 жилийн ойг тэмдэглэн өнгөрүүлэх ажлын төлөвлөгөөг хэлэлцэж 18 төрлийн ажил зохион байгуулж ажиллахаар шийдвэрлэв.
Ж.Самбуу нь Өмнөговь аймгийн анхны даргаар томилогдон ажиллаж байсан ба аймгийн анхны шав суурийг тавьж ажил амьдралынхаа 4 гаруй жилийг тус аймгийн хөгжил цэцэглэлтэд зориулсан түүхэн гавьяатай нэрт хүмүүн билээ. Засгийн газрын түвшинд зохион байгуулагдах тус ойн арга хэмжээнд Өмнөговь аймаг онцгой ач холбогдол өгч тодорхой үйл ажиллагаа зохион байгуулж ажиллахаар шийдвэрлэлээ.
