Өмнөговь аймгийн иргэдийн Төлөөлөгчдийн Хурал, Засаг даргын тамгын газраас Өмнөговь аймагт үйл ажиллагаа явуулж буй уул уурхайн компаниуд, тэдгээрийн туслан гүйцэтгэгч компаниудын төлөөлөлтэй орон нутгийн хөгжил дахь аж ахуйн нэгжүүдийн оролцоо, хамтын ажиллагааны чиглэлээр зөвлөлдөх уулзалтыг 2025 оны 04-р сарын 3, 4-ний өдрүүдэд Улаанбаатар хотод зохион байгуулж байна.
Өмнөговь аймаг улсын төсөвт 2021 онд 78.3 тэрбум, 2022 онд 264.7 тэрбум, 2023 онд 456.4 тэрбум, 2024 онд 1419.9 тэрбум төгрөг төвлөрүүлсэн бол 2025 онд 1769.1 тэрбум төгрөг төвлөрүүлэх үүрэг хүлээсэн. Улс, аймгийн татварын орлогыг бүрдүүлэхэд Өмнөговь аймагт үйл ажиллагаа явуулж буй уул уурхайн болон бусад чиглэлээр үйл ажиллагаа явуулж буй ААН-үүдийн оролцоо чухал үүрэг гүйцэтгэдэг.
Арга хэмжээний эхний өдөр төр, хувийн хэвшлийн хамтын ажиллагааг нэмэгдүүлэх, ААНОАТ-ын хуулийн хэрэгжилт, цаг үеийн мэдээллээр хангах зорилгоор банк, санхүүгийн байгууллагын удирдлагуудын уулзалтыг зохион байгуулсан. Уулзалтад УИХ-ын гишүүн, Эдийн засгийн байнгын хорооны дарга Р.Сэддорж, Өмнөговь аймгийн Засаг дарга Н.Энхбат, Монгол банкны дэд ерөнхийлөгч Г.Энхтайван болон бусад албаны хүмүүс оролцов. Мөн шатахуун түгээх станц болон үүрэн холбооны операторуудын удирдлагуудтай уулзаж, аймгийн Засаг дарга Н.Энхбат, Засаг даргын орлогч Ж.Занабазар, ЗДТГ-ын СТСХ-ийн хэлтэс, ХЭЗХ, аймгийн Татварын газрын дарга нар болон холбогдох мэргэжилтнүүд мэдээлэл өгсөн.
Энэхүү уулзалт хэлэлцүүлэг 2 дахь өдрөө Улаанбаатар хотноо амжилттай зохион байгуулагдаж байгаа бөгөөд энэ үеэр Өмнөговь аймгийн бизнес эрхлэгчид нь өөрсдийн бүтээгдэхүүн үйлчилгээг мөн танилцуулж байна.
