Татварын ерөнхий газраас “Тавантолгой” ХК-ийг 2024 онд улсын төсвийг бүрдүүлэхэд онцгой хувь нэмэр оруулсан “Татвар төлөлтөөрөө тэргүүлэгч ТОП-10” аж ахуйн нэгжийн нэгээр шалгаруулж, өргөмжлөлийг өнөөдөр буюу 2025 оны 05 дугаар сарын 05-ны өдөр тус компанийн гүйцэтгэх захирал Ч.Гүнждагвад гардууллаа.
2024 онд хамгийн их татвар төлсөн аж ахуйн нэгжүүдийг “Эрдэнэс тавантолгой” ХК тэргүүлсэн бол, “Оюутолгой”, “Эрдэнэт үйлдвэр”, “Энержи ресурс” ХХК удаалж, Өмнөговь аймгийн орон нутгийн өмчит “Тавантолгой” ХК тавдугаарт жагсжээ.
Монгол Улсын Засгийн газрын 2000 оны 05 дугаар сарын 01-ний өдрийн хуралдааны шийдвэрийн дагуу Татварын ерөнхий газраас жил бүрийн 05 дугаар сарын хоёр дахь долоо хоногийг "ТАТВАР ТӨЛӨГЧДИЙН ӨДРҮҮД" болгон зохион байгуулж ирсэн бөгөөд энэ жилийн татвар төлөгчдийн өдрүүдийг 2025 оны 05 дугаар сарын 05-наас 09-ний өдрийн хооронд “ЗӨВЛӨН ТУСЛАГЧ ТАТВАРЫН АЛБА" уриан дор, 26 дахь жилдээ орон даяар зохион байгуулж байна.
Энэхүү өдрүүдийн хүрээнд Татварын алба нь татвар төлөгч иргэн, аж ахуйн нэгж, байгууллагуудад татварын хууль тогтоомжийн өөрчлөлт, шинэчлэлтийг сурталчлан таниулах, ШИЛДЭГ ТАТВАР ТӨЛӨГЧДИЙГ ШАЛГАРУУЛАХ, олон нийтэд алдаршуулах, тухайн онд татварын албанаас хийж хэрэгжүүлэх онцлох ажлыг олон нийтэд таниулах зэрэг олон талт арга хэмжээг зохион байгуулж байна.
