Монгол Улсын бүсчилсэн хөгжлийн үзэл баримтлал, бодлого үйл ажиллагааны хэрэгжилтийг эрчимжүүлэх, Говийн бүсийн аймгуудын төлөөлөгч нар бүсийн хөгжлийн тэргүүлэх чиглэл, хөрөнгө оруулалтын төлөвлөлтөө тодорхойлж саналаа нэгтгэн Монгол Улсын Засгийн газрын өргөтгөсөн хуралдаанд шийдвэрлүүлэх асуудлуудыг өргөн барих зорилготой “Говийн бүсийн аймгуудын төлөөлөгч нарын уулзалт” Дорноговь аймагт зохион байгуулагдаж байна.
Энэхүү арга хэмжээ Дорноговь аймагт 2 дахь өдрөө амжилттай зохион байгуулагдаж байгаа бөгөөд бүсийн зөвлөлийн төлөөлөгчдийн хуралдаанаар эхэлж, Өмнөговь, Дундговь, Дорноговь, Говьсүмбэр аймгуудын дарга, удирдлагууд, төлөөлөгчид оролцсон юм.
Энэ үеэр Өмнөговь аймгийн засаг дарга Н.Энхбат 4 чиглэлд хамтын ажиллагааны санамж бичгийг байгууллаа. Үүнд:
1. Аялал жуулчлалын салбар бүсчилсэн хөгжих, эрх зүйн орчныг сайжруулах, тулгамдаж буй асуудлуудыг шийдвэрлэх зэрэг зорилтуудын хүрээнд “Аялал жуулчлалын мэргэжлийн холбоо” Нийтийн эрх зүйн хуулийн этгээдийн ерөнхийлөгч Т.Баттулга
2. Өмнөговь аймгийн нутаг дэвсгэрт барилга байгууламжийн холбогдох хууль дүрэм, журам, стандартын хэрэгжилтийг сайжруулах, төсөл арга хэмжээний зураг төсөл гүйцэтгэлийн чанарыг сайжруулах зорилтын хүрээнд “Барилгын хөгжлийн төв” ТӨҮГ-ын захирал МУ-ын зөвлөх инженер П.Пүрэвхатан
3. Бүсийн аймгуудад мэргэжилтэн, боловсон хүчин бэлтгэхэд чиглэсэн магистр, докторын хамтарсан хөтөлбөр хэрэгжүүлэх зорилготойгоор ШУТИС-ын Менежментийн сургуулийн захирал Г.Баттүвшин
4. Төрийн өмчийн “Үйлдвэрлэл, технологийн парк”-ыг байгуулах зорилгоор “Эрдэнэс үйлдвэр технологийн парк”-ын төслийн зохицуулагч Ж.Энхтүвшин нартай тус тус хамтын ажиллагааны санамж бичиг байгууллаа.
