Өмнөговь аймаг Засаг даргын үйл ажиллагааны “Өсөлттэй Өмнөговь” хөтөлбөрийн гол зорилт нь өрхийн үйлдвэрлэлээс жижиг, дунд үйлдвэрлэл рүү шилжих, үйлдвэрлэгч аж ахуйн нэгжүүдийг чадавхжуулах, бизнесийг өргөжүүлэх, борлуулалтыг нэмэгдүүлэх боломжийг бий болгох, үйлдвэрлэлийн бүс бий болгож, дэд бүтцийн бүтээн байгуулалтыг орон нутгийн төсвөөс хийж, үйлдвэрлэлийн зориулалтаар үнэ төлбөргүй газар олгож, татварын хөнгөлөлт үзүүлэх зэрэг үйлдвэрлэлийг дэмжсэн томоохон бодлого хөтөлбөр боловсруулан хэрэгжүүлж байна. Энэ хүрээнд аймгийн ЗДТГ, Хүнс хөдөө аж ахуйн газар хамтран 2025 оны 4-р сард “Өсөлттэй Өмнөговь-ЖДҮ оролцоо” арга хэмжээг зохион байгуулж 300 гаруй иргэн аж ахуйн нэгжид хөнгөлөлттэй зээлд хамрагдах чиглэлээр зөвлөн туслах нэг цэгийн үйлчилгээ үзүүлэн ажилласны үр дүнд Өмнөговь аймагт 157 төслийн 18,5 тэрбум төгрөгийн зээлийн хүсэлт ирүүлсэнд улсын хэмжээнд хамгийн өндөр үзүүлэлт болсон байна. Аймгийн удирдлага, ИТХ-ын шийдвэрээр орон нутгийн төсвийн хүрээнд жижиг дунд үйлдвэрлэлийг дэмжих хөнгөлөлттэй зээлийн эх үүсвэрийг 3 тэрбум төгрөгөөр нэмэгдүүлэн 8,2 тэрбум төгрөг болгон зээлд хамрагдах хүсэлт гарган, төсөл болон зээлийн шаардлага хангасан бүх аж ахуйн нэгж буюу 55 аж ахуйн нэгжид хөнгөлөлттэй зээл олгохоор шийдвэрлэжээ. Дашрамд дурдахад Өмнөговь аймаг 2019 оноос орон нутгийн төсвийн хөрөнгөөр жижиг дунд үйлдвэрлэл эрхлэгчдэд 5 хүртэлх жилийн хугацаатай 3 хувийн хүүтэй зээлийг олгож эхэлсэн бөгөөд өнгөрсөн хугацаанд нийт 143 аж ахуй нэгжид 22.2 тэрбум төгрөгийн зээл олгосноор 208 ажлын байр хадгалагдаж, 510 ажлын байр шинээр нэмэгдэн үйл ажиллагаа нь өргөжиж үйлдвэрлэх бүтээгдэхүүний чанар сайжирсан үзүүлэлттэй байна.
