"Тавантолгой" ХК-ийн байгаль орчныг хамгаалах төлөвлөгөөнд сөрөг нөлөөллийг бууруулах, усны хэрэглээг багасгах, тоосжилтыг бага түвшинд байлгах зорилтыг хэрэгжүүлэх үүднээс шинэ дэвшилтэт технологи нэвтрүүлж байна. Энэ хүрээнд тус компанийн Байгаль орчны албанаас 2025 оны 9 дүгээр сараас эхлэн уурхайн технологийн замын усалгаанд тоос барьцалдуулагч бодисыг ашиглаж, энэ ажлын үр дүнг илэрхийлэх судалгааны ажлыг хийж гүйцэтгэлээ. Судалгааны хүрээнд замын усалгааг бодисгүй болон бодистойгоор хөрс хуулалтын туслан гүйцэтгэгч Говь түрүү ХХК, Дархан эрхэт майнинг ХХК, Ёл Ази ХХК, Топ ган ХХК-ууд хамтран гүйцэтгэж, тоосжилт, агаарын чанарыг 12 цагаар “Dusttrak aerosol monitor 8530” багажаар хэмжиж, усалгааны давтамж, тоос үүсэх байдал, дата мэдээлэлд тулгуурласан үр дүнг гаргажээ. Уг судалгааны үр дүнгээс харахад 30 хоногийн бодистой усалгаа хийхэд усны хэрэглээ 25%-аар буюу 7,000 м3 багассан, тоосны хэмжээ 0.182 мкг/м3-аар буюу 2.5 дахин буурсан үзүүлэлттэй байна. Технологийн замд ашиглаж буй “GUARDIAN”-тоос барьцалдуулагч бодисыг зам усалгааны зориулалттай машинд устай хольж, шүршиж усалснаар замын гадарга дахь тоосонцрын жижиг хэсгүүдийг нийлүүлэн барьцалдуулж, тоос ялгаралт, ус ашиглалтыг үр дүнтэйгээр багасгадаг төдийгүй уг бодисыг тогтмол хэрэглэснээр усны хэрэглээг бууруулах, усалгааны давтамжийг цөөрүүлж, усны хэмнэж, агаарын бохирдлыг бууруулж байгаль орчинд эерэг нөлөө үзүүлэх ач холбогдолтой юм.
