Өмнөговь аймаг эдийн засгаа солонгоруулж, аялал жуулчлалаа тэргүүлэх салбар болгож хөгжүүлэх зорилтын хүрээнд байгалийн үзэсгэлэнт газруудын менежментийн төлөвлөгөөг баталж, орон нутгийн төсвийн хөрөнгө оруулалтаар дэд бүтцийн бүтээн байгуулалтыг хийж байна. Өнгөрсөн жилүүдэд Баян заг байгалийн үзэсгэлэнт газрын аялал жуулчлалын менежментийн төлөвлөгөөг хэрэгжүүлж, орчны тохижилт, мэдээллийн төвийг байгуулж, Баян заг орчмыг цахилгаан эрчим хүчний системд холбож, Даланзадгад-Булган чиглэлийн хатуу хучилттай авто замаар холбох ажлыг эхлүүлээд байна. Аялал жуулчлалын хөгжлийн төлөвлөлтийн дагуу Өмнөговь аймгийн Засаг даргын үйл ажиллагааны “Өсөлттэй Өмнөговь” хөтөлбөрийн хүрээнд Дэлхийн энергийн төв Дэмчогийн хийдийн менежментийн төлөвлөгөөг боловсруулан дэд бүтцийн бүтээн байгуулалтын ажлыг үе шаттайгаар хийж байна. Энэ хүрээнд орон нутгийн төсвийн хөрөнгө оруулалтаар Дэмчогийн хийдийг төвийн эрчим хүчний системд холбож, Дэмчогийн хийд хүртэлх 17,2 км хатуу хучилттай авто замын бүтээн байгуулалт дуусаж ашиглалтад орлоо. Бүтээн байгуулалтын ажил үргэлжилж ирэх онд Дэмчогийн хийдийн аялал жуулчлалын мэдээллийн төв ашиглалтад орох ажээ. Ингэснээр Дэмчогийн хийд аялал жуулчлалын томоохон төв болон хөгжих боломж бүрдэж байгаа гэдгийг орон нутгийн удирдлагууд онцоллоо.
