Өмнөговь аймаг хүүхэд, залуучуудыг спортоор хичээллүүлэх багийн спортыг хөгжүүлэхэд орон нутгийн зүгээс онцгой анхаарч, спорт зал, сургуулиудын гадна талбай, гэр хороолол, сумын төвүүдэд хөл бөмбөг, сагсан бөмбөгийн стандартын талбайн бүтээн байгуулалтыг тасралтгүй хийхийн зэрэгцээ аймгийн ИТХ-аас спортын баг тамирчдыг урамшуулах журмыг батлан хэрэгжүүлж байгаа юм. Орон нутгийн эдгээр бодлого, дэмжлэгийн үр дүнд Өмнөговь аймгийн спортын холбоодын үйл ажиллагаа сайжирч багийн спорт эрчимтэй хөгжиж, тус аймгийн тамирчид улс, бүс, олон улсын уралдаан тэмцээнд амжилт гаргасаар байгаа билээ. Өмнөговь аймаг стандартад нийцсэн хөл бөмбөгийн талбайг бүтээн байгуулалтыг хамгийн их хийсэн аймаг төдийгүй хөл бөмбөгийн спортоор хичээллэх хүүхэд залуусын тоогоороо улсдаа дээгүүр ордог аймаг болсон юм.
Өмнөговь аймгийн Хөл бөмбөгийн холбоо нь идэвхтэй үйл ажиллагаа явуулдаг холбоодын нэг бөгөөд олон зуун хүүхэд багачуудыг хөл бөмбөгийн спортоор хичээллүүлэн улс, бүсийн тэмцээн, уралдаанд амжилттай оролцуулж, Монгол Улсын Ерөнхийлөгчийн нэрэмжит анхны футзалын тэмцээнийг орон нутагтаа зохион байгуулан хөл бөмбөгийн спортыг орон нутагтаа хөгжүүлэхэд үнэтэй хувь нэмрээ оруулж яваа спортын холбоо юм. Тус холбооны тэргүүлэгчдийн хуралдаан 2025 оны 11-р сарын 13-ны өдөр хуралдаж, 2025 онд хийж хэрэгжүүлсэн ажлаа тайлагнаж холбооны тэргүүнээр Даланзадгад сумын Засаг даргын орлогч Ө.Хосбаярыг сонголоо. Дашрамд дурдахад Өмнөговь аймагт хөл бөмбөгийн спортыг хөгжүүлэхэд үнэтэй хувь нэмрээ оруулсан хүний нэг бол хөл бөмбөгийн спортын мастер Н.Намхайнар агсан бөгөөд аймгийн хөл бөмбөгийн аваргын тэмцээнийг “Гурван сайхан” нисэх буудлын нэрэмжит болгон анхлан эхлүүлж байсан нь өнөөг хүртэл үргэлжилж байгаа билээ.
