Тавантолгой компанийн нэрэмжит "Намрын отго харваа" 11-р сарын 8-9-ний өдрүүдэд Даланзадгад суманд болж өндөрлөлөө. Тус компани Монгол үндэсний өв соёл болох шагайн харвааг түгээн дэлгэрүүлэх, үр хойчдоо өвлүүлэн үлдээх, сурталчлах зорилгоор “Намрын отго харваа"-г 39 дэх жилдээ зохион байгуулж байгаа бөгөөд энэ жилийн отго харваанд 30 багийн 240 гаруй харваачид цэц мэргэнээ сорин өрсөлдлөө. Багийн хуруу харваанд Даланзадгад сумын Б.Амаржаргал ахлагчтай "Үнэт өв" баг тэргүүн байрт, Цогтцэций сумын залуу харваач С.Тулгахүү ахлагчтай баг дэд байрт, Ханбогд сумын Монгол Улсын гарамгай мэргэн, Ханбогд сумын шагайн салбар зөвлөлийн тэргүүн Д.Банзрагч ахлагчтай баг гутгаар байрт шалгарав.
Хурууны хувийн цуваа харваанд Өмнөговь аймгийн Баян-Овоо сумын харьяат, Аймгийн гоц мэргэн Э.Энхбат тэргүүн байр, Өмнөговь аймгийн ХЖТ-ын залуу харваач Б.Баасандорж дэд байр, Ханбогд сумын Монгол Улсын гарамгай мэргэн, Ханбогд сумын шагайн салбар зөвлөлийн тэргүүн Д.Банзрагч гутгаар байр тус эзэллээ.
Ахмадын чавх харваанд МУ-ын харьшгүй мэргэн Д.Цогбадрах ахлагчтай баг тэргүүн байр, Цогтцэций сумын ахмад харваач Г.Түмэнбаяр ахлагчтай баг дэд байр, МУ-ын харьшгүй мэргэн М.Бат-Очир ахлагчтай баг гутгаар байрт шалгарсан байна. Чавх харвааны хувийн цуваа харваанд Номгон сумын харьяат, Аймгийн гоц мэргэн С.Очирсүрэн тэргүүн байр, Цогт-Овоо сумын ахмад харваач Г.Бямбадорж дэд байр, Цогтцэций сумын ахмад харваач С.Адьяабат нар гутгаар байр эзэллээ.
Энэ жилийн намрын отго харвааны үеэр Тавантолгой ХК-ийн ажилтан, Монгол Улсын Үлэмж дархан мэргэн, Монголын шагайн харвааны холбооны тэргүүлэгч, Монголын шагайн харвааны холбооны шүүгчдийн зөвлөлийн ахлагч, улсын шүүгч Цэдэвсүрэнгийн Одсүрэнгийн уул уурхайн салбарт олон жил үр бүтээлтэй ажилласан хөдөлмөр зүтгэлийг үнэлж МУ-ын Засгийн газрын шагнал “Тэргүүний уурхайчин” цол тэмдгээр, Монгол Улсын Гарамгай Мэргэн Ж.Баасанхүүг Спортын мастер цолоор шагналаа. Мөн компанийн ахмад уурхайчин, шагайн харвааны ахмадын багийн ахлагч Ш.Жаргалсайхан, Ч.Баяраа нар Монгол улсын Харьшгүй мэргэн цол хүртсэн байна.
