Өмнөговь аймгийн Засаг дарга үйл ажиллагааныхаа “Өсөлттэй Өмнөговь” хөтөлбөрийн хүрээндээ сумдын иргэдийн ая тухтай амьдрах боломжийг бүрдүүлэх, ажлын байрыг нэмэгдүүлэх чиглэлээр олон, олон бүтээн байгуулалтуудыг орон нутгийн төсвийн хөрөнгө оруулалтаар хийсээр байгааг бид өмнө мэдээлж байсан билээ.
Энэхүү бүтээн байгуулалтуудын хүрээнд Ноён суманд “Нийтийн ахуйн үйлчилгээний байр” баригдаж, ашиглалтанд орсон байна. Тус байранд олон нийтийн үйл ажиллагаа, хоол үйлдвэрлэл, зочид буудлын үйлчилгээ явуулж, үүнийг дагасан ажлын байр бий болох, иргэд ая тухтай үйлчилгээ авах нөхцөл бүрдэнэ гэж үзжээ.
Мөн Гурвантэс суманд залуусын хөгжих, чөлөөт цагаа үр бүтээлтэй өнгөрүүлэх орчин нөхцөлийг бүрдүүлэх зорилготой “Хүүхэд, залуучуудын хөгжлийн төв”-ийн 3 давхар барилгыг барьж, ашиглалтад оруулжээ.
Дээрхи хөгжлийн төвд төрөл бүрийн спортын дугуйлан, хүний хөгжлийн сургалтууд, бүжгийн дугуйлан, кофе шоп, филиппин багштай англи хэлний сургалтыг нээн хүүхэд, залуусыг олон талаар хөгжих боломжийг бүрдүүлэн ажиллаж байгаа юм байна.
