Өмнөговь аймагт гарч байгаа зам тээврийн осол, хэргийн 60 гаруй хувийг Тавантолгой бүлэг ордоос Гашуун сухайт чиглэлийн автозамд гардаг гэсэн судалгаа байна. Өмнөговь аймгийн Гэмт хэргээс урьдчилан сэргийлэх салбар зөвлөлийн 2019 оны төлөвлөгөөнд зам тээврийн осол, хэргийг бууруулах зорилт тавьж тодорхой ажил, арга хэмжээ зохион байгуулахаар төлөвлөн ажиллаж байна. Энэ ажлын хүрээнд Өмнөговь аймгийн Цагдаагийн газраас “Гэмт хэрэг, зөрчил, зам тээврийн ослоос урьдчилан сэргийлэхэд төрийн байгууллага, аж ахуйн нэгжийн хамтын ажиллагаа” сэдэвт уулзалт, зөвлөгөөнийг Цогтцэций суманд 112 аж ахуйн нэгж байгууллагын 136 төлөөлөгч, удирдах албан тушаалтнууд оролцуулан зохион байгууллаа.
Зөвлөгөөнөөр Тавантолгой Гашуун сухайт чиглэлийн нүүрс тээвэрлэлтийн авто замд гарч буй зам тээврийн осол, хэрэг зөрчлийг бууруулах урьдчилан сэргийлэх, замын хөдөлгөөний аюулгүй байдлын тухай хууль, Замын хөдөлгөөний дүрмийн хэрэгжилтийг хангуулах, аж ахуйн нэгж байгууллагуудын хариуцлагыг дээшлүүлэх, тус авто замд иргэд жолооч нарт тулгамдаж байгаа асуудлыг хэлэлцэж, аж ахуйн нэгж байгууллагын төлөөлөлтэй санал солилцон, хэрхэн хамтран ажиллах талаар хэлэлцлээ. Зөвлөгөөнд оролцогчдоос “ЭРҮҮЛ АЮУЛГҮЙ ОРЧИНГ БҮРДҮҮЛЖ, ГЭМТ ХЭРЭГ, ЗӨРЧИЛ, ОСОЛ АВААРГҮЙ БҮС НУТАГ БОЛГОХЫН ТӨЛӨӨ ХАМТАРЧ АЖИЛЛАЯ” уриалгыг гаргаж хэрэгжүүлэхийн төлөө хамтран ажиллахаар шийдвэрлэв.