Польш Улсын Торун хотноо өнгөрсөн гуравдугаар сарын 24-30-ны хооронд үргэлжилсэн хөнгөн атлетикийн мастеруудын тэмцээнд дэлхийн 88 орны 500 гаруй тамирчид хурд хүч авхаалж самбайгаа сорьсон бөгөөд энэ тэмцээн д манай улсаас 13 тамирчин оролцсон бөгөөд 4 алт, 4 мөнгөн медаль хүртсэн бахдам амжилтыг үзүүлсэн билээ
Өмнөговь аймгийн Баяндалай сумын уугуул 85 настай Ц.Раднаа Монголын баг тамирчдын амжилтыг манлайлж гурван төрөлд түрүүлж Дэлхийн аварга болж, нэг төрөлд дэд байранд орж Мөнгөн медаль хүртэж Монгол хүний эр зориг, тэс тэвчээрийг дэлхийн дэвжээнд гайхуулсан билээ. Тэрээр 85 настай ахмад тамирчин маань тэмцээний эхний өдөр 400 метрийн гүйлтийн тэмцээнд түрүүлж Дэлхийн рекордыг эвдэж, удаах өдөр 60 метрийн саадтай гүйлт, 200 метрийн гүйлтийн тэмцээнд амжилттай уралдан, Алтан медаль, Мөнгөн медаль хүртсэн бол тэмцээний сүүлийн өдөр уртын харайлтын төрөлд өрсөлдөж дахин Алтан медаль хүртсэн. Ийнхүү 85 настай ахмад багш Ц.Раднаа Дэлхийн аваргын энэ тэмцээнээс 3 Алтан медаль, 1 мөнгөн медальтай эх орондоо ирлээ.
Дэлхийн аваргыг өнөөдөр өглөө Чингис хаан нисэх онгоцны буудалд түүний хань үр хүүхдүүд болон Гавьяат тамирчин кёкүшюзан Д.Батбаяр, түүний дүү Баяндалай сумын биеийн тамирын ахмад багш Д.Бариул, адуучин Гомбо нар буурлууд Өмнийн говиос зорин ирж хүндэтгэн тосон авлаа. Дэлхийг гайхуулсан амжилтыг үзүүлж Монгол улсын нэрийг өндөрт өргөсөн ахмад тамирчин Ц.Раднаа тандаа нутгийн зон олны өмнөөс халуун баяр хүргэж эрүүл энх, урт удаан наслахыг хүсэн ерөөе.
Н.Адьяацэрэн