Өмнөговь аймаг 2019 оныг “СОЁЛЫГ ДЭМЖИХ ЖИЛ” болгон зарлаж соёл урлагийн салбарт 18 тэрбум төгрөгийн хөрөнгө оруулалт хийхээр төлөвлөжээ. Тухайлбал 850 хүний суудалтай Хөгжимт жүжгийн театр, Олон улсын стандартад нийцсэн аймгийн Музей, Баяндалай, Номгон, Ноён сумын соёлын төвийн барилгууд, Ханхонгор сумын соёлын төвийн барилгад их засвар хийгдэхээр орон нутгийн төсөвт тусгасан ажээ. Мөн орон нутгийн төсвийн хөрөнгөөр 14 сумын соёлын төвийг албан хэрэгцээний автомашинаар хангасан юм.
Өмнөговь аймгийн Засаг даргын үйл ажиллагааны “Бид хамтдаа” хөтөлбөрт соёлын өвийн хадгалалт, хамгаалалтыг сайжруулах, судлах, уламжлуулах зорилт тусгагдсаны дагуу нутгийн уртын дуу, аялгуут магтаал, амбан билэг ерөөл, морин хуурын татлагын өв санг залуу үед өвлөн уламжлуулах, түгээн дэлгэрүүлэх, олон нийтэд сурталчилан таниулах зорилгоор аймгийн Язгуур урлагийн хоёрдугаар бага наадмыг 2019 оны 04 дүгээр сарын 16-18-ны өдрүүдэд Даланзадгад хотноо амжилттай зохион байгууллаа. Энэ наадам нь соёлын биет бус өвийг уламжлагч Монгол улсын Ардын жүжигчин Ц.Цэрэндорж, Монгол улсын Соёлын гавьяат зүтгэлтэн П.Байгальжав, Гомбын Оргой нарын нэрэмжит морин хуур, ерөөл магтаал, аялгуут магтаал, уртын дуу зэрэг төрлүүдээр 15 сумдын нийт 380 гаруй соёлын биет бус өвийг өвлөн уламжлагч, ардын авьяастанууд авьяас билгээрээ өрсөлдлөө.