Өмнөговь аймаг, Оюутолгой ХХК хоорондын хамтын ажиллагааны хүрээнд орон нутгийн иргэдийг ажлын байраар хангах ажлыг дэмжих, орон нутгийн ханган нийлүүлэгчдийг дэмжих гэсэн 2 чиглэлээр ажлын хэсэг байгуулагдан ажиллаж байгаа билээ. Өнгөрсөн хугацаанд нутгийн иргэдийг Оюутолгой уурхайд ажлын байраар хангах, орон нутагт үйлдвэрлэж буй бараа бүтээгдэхүүнийг тус уурхайд нийлүүлэх чиглэлээр тодорхой ажлуудыг хийж хэрэгжүүлж байгаа юм.
Энэ бодлогын хүрээнд хийж хэрэгжүүлж буй ажлын нэг нь ЗДТГ, ХХҮГ, Оюутолгой компаний хамтарсан "ТҮНШЛЭЛ-2019" өдөрлөг юм. Энэхүү өдөрлөгийг Өмнөговь аймгийн ЗДТГ, ХХҮГ, Оюутолгой компаний хамтарсан Даланзадгад суманд зохион байгууллаа. Уг өдөрлөгт Оюутолгой ХХК-ийн гэрээт 26 компани оролцож, 233 нээлттэй ажлын байранд 1020 иргэнийг бүртгэж, ярилцлага авснаар 64 иргэнийг шууд ажлын байртай болсон хэдий ч 360 гаруй орон тоо сул үлдсэн байна. Цаашид иргэдийг богино хугацаанд мэргэжилтэй болгож ажлын байранд зуучлах ажлыг Засаг даргын Тамгын газар, Хөдөлмөр халамжийн үйлчилгээний газар, аймгийн Политехникийн коллеж хамтран хэрэгжүүлнэ гэдгээ аймгийн Засаг дарга Н.Наранбаатар онцоллоо.