Өмнөговь аймаг нь 13 сумын нутаг дэвсгэрийг хамарсан 1189226 га талбайд тархсан заган ойтой бөгөөд заг бүхий ойн сангийн талбайгаар улсдаа хоёрт буюу Говь-Алтай аймгийн дараа ордог аймаг. Мөн тарьмал ойн сангийн талбайн хэмжээгээр улсдаа тэргүүлдэг аймаг юм. Иргэд, аж ахуйн нэгж байгууллагын мод тарих идэвхийг өрнүүлэх, ногоон байгууламжийн талбайг нэмэгдүүлэх зорилгоор аймгийн ИТХ-ын тогтоолоор “Мод тарьж ургуулсан иргэн, аж ахуйн нэгж, байгууллагад урамшуулал олгох журам”-ыг батлан хэрэгжүүлж байна. Тухайлбал 2018 оны жилийн эцсийн байдлаар 15148 мод тарьж ургуулсан 65 иргэнд 17,2 сая төгрөгийн урамшуулал олгосон. 2013-2018 онд нийт 2,272,468 мод тарьж ургуулан, ногоон байгууламжийг 2398,2 га талбайгаар нэмэгдүүлсэн байна.
2007 оноос Монгол–Солонгосын хамтарсан Ногоон хэрэм төслийг Булган, Даланзадгад сумдад амжилттай хэрэгжүүлж нийт 2000 орчим га талбайд ойн зурвас байгуулсан нь уур амьсгалын хүнд нөхцөлтэй, уул уурхай хөгжиж, цөлжилт ихээр явагдаж буй нутгийн байгаль орчинд том хөрөнгө оруулалт болсон. Ногоон хэрэм төсөл хэрэгжсэн 12 жилийн хугацаанд 800 гаруй түр болон байнгын ажлын байраар орон нутгийн иргэдийг хангасан байна.
Өнөөдөр буюу 4 сарын 29 ны өдөр БНСУ-аас Монгол улсад суугаа элчин сайд Жон Жэ Нам, Ногоон хэрэм төслийн захирал Сон Ин Гён нар Өмнөговь аймагт хүрэлцэн ирж Ногоон хэрэм төслийн хүрээнд ойжуулсан Даланзадгад сумын нутагт байрлах 100 га ойжуулалтын талбай, 20 га мод үржүүлгийн газар, Булган суманд байрлах 400 га заган ойн зурвас талбайг Өмнөговь аймгийн сум дундын Ойн ангид хүлээлгэн өглөө. Цаашид арчилж хамгаалах, усалж ургуулах ажлыг Өмнөговь аймгийн сум дундын ойн анги хариуцан ажиллах юм.
