Өмнөговь аймаг 2019 оныг Соёлыг дэмжих жил"- болгон зарласан бөгөөд энэ хүрээнд Өмнөговь аймаг соёл урлагийн салбар, уран бүтээлчдээ дэмжсэн 18 тэрбум төгрөгийн хөрөнгө оруулалтыг хийхээр төсөвлөжээ. Даланзадгад хотод орчин үеийн шаардлага хангасан Музейн барилга, 800 хүний суудалтай театрын барилгуудыг баригдаж байгаа бөгөөд 14 сумдын соёлын төвүүдийг засварлах, автомашин, хөгжим техник хэрэгслээр хангаж байгаа соёлыг эрхэмлэдэг аймаг болоход чиглэсэн ажлуудыг шат дараалалтай хэрэгжүүлж байгаа билээ.
Орон нутагт хэрэгжүүлж буй энэхүү бодлогыг Өмнөговиор овоглосон уран бүтээлчид дэмжин Улаанбаатар хотноо “Их ундарга” урлагийн тоглолт, үзэсгэлэн зохион байгуулахаар болжээ. Энэхүү тоглолт, үзэсгэлэн 2019 оны 5 сарын 16 нд UB place –ийн концертын их танхимд болох юм.
“Их ундарга” тоглолтонд Өмнөговь нутгаараа овоглосон Ардын жүжигчин, Төрийн хан хуурч Ц.Цэрэндорж, Урлагийн гавьяат зүтгэлтэн Г.Аюуш , МУГЖ Ө.Батжаргал, Монголын радиогийн нэвтрүүлэгч,МУСГЗ Д.Билгээ, Үндэсний урлагийн их театрын удирдаач, МУГЖ, Н.Буянбаатар, МУГЖ, Харанга хамтлагийн дуучин, Л.Энхманлай, Цэргийн дуу бүжгийн дуучин, шинэхэн гавьяат Л.Батсүрэн, МУГЖ, дуучин Э.Бүрнээбаяр, МУГЖ, бүжигчин Ж.Цэцэгмаа болон дуучин СТА Т.Батсайхан, Уртын дуучин О.Оюун-Эрдэнэ, хөөмийч Н.Наранбадрах, дууриин дуучин А.Сайнбаяр, Ч.Энхтайван зэрэг 100 гаруй уран бүтээлчид оролцож ая дуугаа өргөн барих юм. Мөн энэ үеэр Өмнөговь нутгаас төрөн гарсан уран бүтээлчдийн гар урлалын үзэсгэлэн гарна.
Дашрамд дурьдахад 2018 онд Өмнөговь аймгаар овоглосон уран зураачид, гар урчууд, телевиз, радиогийн, тайз дэлгэцийн, Монгол улсын мэргэжлийн урлагийн театр, чуулга, Монгол улсын соёл урлагийн их сургуулийн багш нар, мэргэжлийн сургууль төгссөн 60 гаруй уран бүтээлчид нэгдэн “Говь гурван сайхан” уран бүтээлчдийн холбоо байгуулан ажиллаж байгаа бөгөөд “Их ундарга” тоглолтоороо албан ёсны нээлтээ хийх ажээ.
