Эрдэм шинжилгээний бага хурал амжилттай боллоо.
“COP 17 хурлыг угтаж “Цөлжилтийн эсрэг ногоон ирээдүй” олон улсын эрдэм шинжилгээний бага хурал Өмнөговь аймгийн Даланзадгад суманд 2025 оны 10 дугаар сарын 3-ны өдөр амжилттай боллоо. Хоёр дахь удаагаа зохион байгуулагдаж байгаа энэхүү Олон улсын эрдэм шинжилгээний бага хурлыг Байгаль орчин, уур амьсгалын өөрчлөлтийн яам, Өмнөговь аймгийн Засаг даргын Тамгын газар, Ус цаг уур орчны судалгаа мэдээллийн хүрээлэн, Шинжлэх ухааны академийн Газарзүй, геоэкологийн хүрээлэн, Оюу толгой компани хамтран зохион байгуулсан юм.
Эрдэм шинжилгээний хурлыг нээж Байгаль орчин уур амьсгалын өөрчлөлтийн сайд Б.Батбаатар үг хэлж, эрдэмтэн мэргэд, судлаачдын дэвшүүлж буй судалгаа мэдээлэл, санаачилгууд дэлхий дахины өмнө сорилт болж буй цөлжилтийн эсрэг авч хэрэгжүүлэх бодлого, арга хэмжээнд түлхэц үзүүлэхийг онцоллоо. Мөн УИХ-ын гишүүн Л.Мөнхбаясгалан, Өмнөговь аймгийн Засаг дарга Н.Энхбат, “Оюу толгой” компанийн Эрүүл мэнд, аюулгүй ажиллагаа, байгаль орчин, аюулгүй байдал, орон нутаг (ЭМААБОАБОН) хариуцсан Ерөнхий менежер Филип Абрахам нар үг хэллээ. Энэхүү хурал нь 2026 онд манай улсад зохион байгуулагдах НҮБ-ын Цөлжилттэй тэмцэх суурь конвенцын талуудын 17 дугаар бага хурлыг (COP-17)угтан цөлжилттэй тэмцэхэд бодитой шийдлүүдийг хамтдаа эрэлхийлсэн ач холбогдол бүхий арга хэмжээ болсон юм. Хуралд Монгол, Австрали, БНХАУ, Япон, Франц зэрэг улсуудын 200 гаруй төлөөлөгчид оролцож, цөлжилт, газрын доройтол, усны нөөцийн тогтвортой ашиглалт, нөхөн сэргээлт, уур амьсгалын өөрчлөлтөд дасан зохицох шийдлийн талаар өргөн хүрээний хэлэлцүүлэг өрнүүллээ. Үндсэн болон салбар хуралдаанаар гадаад, дотоодын эрдэмтэн судлаачдын шинэхэн судалгааны үр дүн, шийдлүүд багтсан нийт 27 аман илтгэлийг хэлэлцлээ. Үүнд цөлжилтийн үйл явцын шинжлэх ухааны үндэслэл, усны нөөцийн инженерийн шийдэл, хиймэл дагуул ба хиймэл оюун ухаанд суурилсан мониторингийн аргачлал, бэлчээрийн тогтвортой менежмент, уур амьсгалын өөрчлөлтийн эрсдэлийг бууруулах технологи зэрэг сэдвүүд багтсан юм.
Хурлын хүрээнд “Боломжуудыг нээцгээе” уулзалт болон “Газрын доройтлыг тэглэх нь” зэрэг сургалтад байгууллагуудын төлөөллүүд оролцож цаашид цөлжилт, газрын доройтол, уур амьсгалын өөрчлөлтийн эсрэг хамтран ажиллах, олон улсын хамтын ажиллагааг хэрхэн бэхжүүлэх талаар шийдлийг хэлэлцэв. Түүнчлэн хурлын үеэр байгууллагуудын танилцуулга, үзэсгэлэн, 40 гаруй ханан илтгэлүүд дэлгэгдэж, оролцогчид туршлага солилцон, хамтын ажиллагаагаа бэхжүүлсэн юм. Цаашид энэхүү эрдэм шинжилгээний хурлыг олон улсын түвшинд уламжлал болгон зохион байгуулж, салбарын мэргэжлийн байгууллагууд, эрдэмтэн судлаачид таамаглалаа баталгаажуулах, цөлжилтийг бууруулах шийдлээ хуваалцах урт хугацааны хамтын ажиллагааны талбар болгохыг зорьж байгааг Байгаль орчин уур амьсгалын яамны удирдлага онцоллоо.
Байгаль орчин, уур амьсгалын өөрчлөлтийн сайд Б.Батбаатар Өмнөговь аймагт ажиллалаа.
Байгаль орчин, уур амьсгалын өөрчлөлтийн сайд Б.Батбаатар Өмнөговь аймагт ажиллаж аймгийн удирдлага болон тус яамны харьяа салбар байгууллагуудын албан хаагчидтай уулзалт хийлээ.
Аймгийн Засаг даргатай хийсэн уулзалтын үеэр уул уурхайн нөлөөллийн бүс гэдэг утгаараа хүлэмжийн хийн асуудал онцгой анхаарал татаж байгааг дуулгаад, говь нутагт усны асуудалд түлхүү анхаарах нь чухал болохыг Б.Батбаатар сайд уулзалтын эхэнд онцоллоо. МУ-ын хэмжээнд 700 орчим булаг, шанд, гол горхи ширгэж устсан. Тиймээс бодлогын шийдвэрүүдийг тасралтгүй гаргах зайлшгүй шаардлага үүссэн хэмээв. Тэрбээр усны асуудал бол зөвхөн Монгол улсын асуудал бус даян дэлхийн өмнө тулгарч буй сорилт болж байна. Тусгай хамгаалалттай газар нутгийн хилийн заагийг тогтоох асуудал 6 орчим жил МУ-ын ЗГ-аар огт хэлэлцэгдээгүй орхигдож байсныг ЗГ-ын хурлаар оруулж батлуулсныг дуулгаад, уур амьсгалын өөрчлөлтийн тухай хууль, тусгай хамгаалалттай газар нутгийн тухай хууль, ойн тухай хууль гэхчлэн салбарын 10 орчим хуулийг шинэчлэн сайжруулж, эрх зүйн чадамжийг бэхжүүлэх чиглэлд онцгойлон анхаарч ажиллаж байгааг дуулгалаа. Мөн салбарын албан хаагчдын хувьд дутагдалтай олон асуудал байна. Тухайлбал байгаль хамгаалагчдын ажлын нөхцөл, хүртээмж, нийгмийн байдал, ажил үүргээ гүйцэтгэхэд шаардлагатай хангамж учир дутагдалтай, цаг уурын байгууллагын албан хаагчид таван жилийн нэмэгдэл авдаггүй цорын ганц салбар гэхчлэн бодлогын дэмжлэг шаардлагатай олон асуудалд анхаарч байгаагаа хэллээ.
САЛБАРЫН АЛБАН ХААГЧИД ТУЛГАМДСАН АСУУДЛАА ТАНИЛЦУУЛАВ
Харин салбарын албан хаагчдын хувьд Өмнөговь аймаг уул уурхайн нөлөөллийн бүс учраас бэлчээр нутаг талхлагдахаас авхуулаад ан амьтдын нүүдэллэх орчин хумигдаж, бүс нутгийн хэмжээнд агаар, орчны бохирдол тулгамдсан асуудал болсоор байгааг онцлов. Өмнөговь аймаг уур амьсгалын өөрчлөлтөд хамгийн ихээр өртөж, цөлжилт эрчимтэй явагдаж байгаа ч байгаль орчны чиглэлийн төсөл хөтөлбөрүүдээс дийлэнх тохиолдолд хасагддаг байна. Мөн Тост тосон бумбын нурууны байгалийн нөөц газар, Говь гурван сайханы байгалийн цогцолборт газар зэрэг тусгай хамгаалалттай газар нутгаас орох орлогын тодорхой хувь хэмжээг орон нутагт нь буцаан зарцуулах чиглэлд бодлогын дэмжлэг шаардлагатай байгааг хамгаалалтын захиргааны удирдлагууд сайдад дуулгалаа. Түүнчлэн байгаль орчны чиглэлээр мэргэжил эзэмших залуусын хандлага эрс буурсан, нэг байгаль хамгаалагчийн хариуцаж ажиллах газар нутгийн хэмжээ хэт том, ажил үүргээ гүйцэтгэх хангамж, техник хэрэгсэл дутмаг зэрэг тулгамдсан асуудлуудаа танилцууллаа.
АЙМГИЙН ЦАГ УУРЫН БАЙГУУЛЛАГААР ОРЖ АЖИЛ БАЙДАЛТАЙ НЬ ТАНИЛЦАВ.
Говийн иргэдийг цаг агаарын мэдээ, мэдээллээр тасралтгүй ханган ажиллаж байгаа Өмнөговийн цаг уурын төв 1936 онд байгуулагдаж, өдгөө нийт 64 хүний бүрэлдэхүүнтэй ажиллаж байна. Өөрийн гэсэн бие даасан нэг давхар барилга 1956 онд ашиглалтад орсон ч ашиглалтын шаардлага хангахгүйд хүрч 2024 оноос шинэ барилгын ажил эхэлжээ. Барилгын ажил 70 хувийн гүйцэтгэлтэй бөгөөд ирэх оны хоёрдугаар улирал гэхэд ашиглалтад орох гэнэ. Цаг уурын байгууллага жил бүр аймгийн хэмжээнд бэлчээрийн даацыг тодорхойлж, малчид ард иргэдийг мэдээллээр хангаж байна. Аймагт энэ жил 80% зуншлага сайн, 20% тааруу зуншлагатай гэж тодорхойлжээ. Сайдад уламжлах гол асуудал нь ирэх онд шинэ барилга ашиглалтад орохтой зэрэгцээд ЗГ-ын цомхотголоор хасагдсан галчийн асуудалд анхаарч өгөхийг хүслээ. Мөн төсвийн хүндрэлтэй холбоотойгоор нийгмийн даатгалд 220 орчим сая төгрөгийн өр үүссэн гэдгийг тус байгууллагын зүгээс танилцууллаа. Түүнчлэн албан хаагчдын нийгмийн дэмжлэг болсон таван жилийн нэмэгдэл авдаггүй ганц салбар нь цаг уурын байгууллагын албан хаагчид учраас үүнд анхаарч өгөхийг хүссэн юм.
